Trintxerpekoek joan den ostegunean Kontxako Ikurriñan egoteko kanporaketan izandako antzeko itsasoko baldintzak topatu dituzte gaurkoan. Horren ondorioz, denborarik onenak egiten ibili dira ziaboga bakoitzean eta helmugara besteen aurretik (21:28.06) heldu. Bigarrena Ondarru izan da (21:40.89). Getxori dagokionez, Trintxerpeko trainerutik sei segundotara eta Ondarrutik lau segundotara geratu da, lehenengo ziabogan. Bigarrenean, Ondarrurekiko aldea mantendu du, baina Trintxerpek hamar segundo atera dizkie. Hirugarren ziabogan, gipuzkoarrek lehen postuan jarraitzen zuten, Ondarru haietatik sei segundotara zegoen eta Getxo 16 segundotara. Azkenean, Getxok, Trintxerpetik 18 segundotara eta Ondarrutik sei segundotara (21:46.77) bukatu du estropada. Laugarren eta azkena Portugalete (22:11.22 ) izan da.
Play-offeko lehenengo jardunaldia (Lekeitio)
1. Trintxerpe: 21:28.06
2. Ondarru: 21:40.89
3. Getxo: 21:46.77
4. Portugalete: 22:11.22
Sailkapen orokorra:
1. Trintxerpe: 4 puntu.
2. Ondarru: 3 puntu.
3. Getxo: 2 puntu.
4. Portugalete: puntu bat.
Igoera oso zail jarri zaio Getxo Arraun Taldeari
2009ko ira. 5a, 17:42
Lekeitioko urek Kantauriko Arraun Elkarteen (KAE) Ligako lehenengo mailara igotzeko erlojupeko bi estropadetatik lehenengoa hartu dute gaur eguerdian. Trintxerpeko trainerua, KAE 2 ligan bigarren postuan amaitu duena, jaun eta jabe izan da eta lehen postuan bukatu du. Getxo Arraun Taldeak, berriz, estropada ona egin du, baina beti hirugarren postuan joan da. Itsasoko baldintzek ez diete mesederik egin arraunlari getxoztarrei eta azkenean hirugarren bukatu dute. Momentuz Trintxerpek abantaila hartu du 4 puntuz, bigarrena Ondarru da 3 puntuz, Getxo Arraun Taldeak 2 puntu dauzka eta Portugaletek bakarra. Gauzak horrela, igoera oso zail jarri zaie gure ordezkariei, baina ez da ezinezkoa. Play-offeko bigarren eta azken estropada bihar jokatuko da, 18:30etik aurrera, Portugaleten. Getxok garaipena lortu behar izango du eta Trintxerpe hirugarren postua geratu dadila itxaron. Hala ere, getxoztarrek 18 segundo baino gehiagoko aldea atera beharko liekete gipuzkoarrei. Argazkian, traineru getxoztarra / © Getxo.net.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun