Amnistiaren Aldeko Mugimenduak (AAM) auzitegiaren erabakia kritikatu du, "Espainiako Gobernuak Euskal Herrian ezarri duen mugarik gabeko errepresioaren urrats berria delako. Errepresioa eremu berrietara zabaltzen ari da". Espainiako Estatuan "adierazpen askatasuna ukatua eta zigortua" dago, AAMren arabera.
Amnistiaren Aldeko Mugimenduaren irakurketa:
Gaztesarearen aurkako operazioa eta ondorengo egozteak espainiar gobernuak Euskal Herrian ezarri duen mugarik gabeko errepresioaren urrats berria direla argi dugu. Oraingoan gazte mugimenduan eta kultur mugimenduan ezagunak izan diren eta diren herritarrak dira salbuespeneko epaitegi honetara deituak izan direnak. Errepresioa eremu berrietara zabaltzen ari dela esaten ari gara azken aldian, eta musikariak, bertsolariak, feministak, ikasle mugimenduko kideak edo gazte mugimendukoak salbuespeneko epaitegi honetara deituak izatea esaten ari garenaren adibide argia da.
Espainiar estatuan adierazpen askatasuna ukatu eta zigortua dago. Komunikabideek ez dute aukerarik beraien lana libreki egiteko. Aurrez Egin, Ardi beltza edo Egunkaria izan dira errepresioak jo dituenak, eta egun Gaztesarearen aurkako bidean aurrera doazela ikusten ari gara.
Auziperatuei gure elkartasuna adierazteaz gain errepresioari aurre egiten jarraitzeko deia luzatzen diegu herritarrei.
Gaztesarearen aurkako auziarekin lotuta, bederatzi euskal herritar deklaratzera deituak izan dira. Horietatik bi adingabekoak dira, eta adingabekoen auzitegian deklaratuko dute datozen egunetan. Gainontzeko zazpiak astelehen eta asteartean agertu beharko dira Espainiako Auzitegi Nazionalean. Aipatu gazte agerkari digitalarekin lotura izan eta kolaborazio delitua egitea egozten diote. Musikariak, bertsolariak, feministak, gazte mugimenduko kideak eta ikasle mugimendukoak dira. Hain zuzen ere, astelehenerako, Mikeldi Zenigaonaindia, Haritz Garrido eta Gorka Urbizu deitu dituzte Madrilera, eta astearterako Jon Maia, Arkaitz Estiballes, Miren Zabaleta eta Aitziber Martinez de Lagos, Amnistiaren Aldeko Mugimenduak adierazi duenez. Honako auzi hau uztailaren 29an izan zuen abiapuntua, Fernando Andreu Auzitegi Nazionaleko epailearen aginduz, Guardia Zibilak egindako polizia operazioaren bitartez. Orduan, Iker Acero Algortako surflari ezaguna atxilotu zuten; baita Alberto Martinez artziniegarra eta Arkaitz Artola donostiarra ere. Epaileak aske utzi zituen hurrengo egunetan, baldintzapean. Argazkian, uztailaren 29an 600 lagun inguruk salatu zituzten atxiloketak Algortan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun