Imanol Landa Getxoko alkateak bere kezka agertu du gaur, abuztuan Ura proiektuak Gobela ibairako aurreikusten zituen berehalako eta aurreratutako lanak agintzeko prozesuaren tramitazioa atzeratu delako. Hori horrela izanda, udal iturrien arabera, joan den ostiralean, Ura agentziaren zuzendari berriari eskutitz bat igorri zion tokiko agintariak, lanak lehiaketara lehenbailehen ateratzeko behar diren erabakiak ahalik eta lasterren har ditzat; "horrela, aurretik ezarrita zegoen epea bete ahal izateko, hau da, lanak epearen barruan egiten hasi ahal izateko, aurtengo azken hiruhilekoan martxan jartzeko alegia", zehaztu dutenez. Landak aipatu duenez, “gaur bertan Uraren zuzendariarekin hitz egin dut telefonoz, eta berak datorren astean batzartzeko borondatea eta konpromisoa ere agertu dit, atzerapenaren arrazoiak argitu eta horri lotuta egungo zuzendaritzak dituen aurreikuspenak jakinarazteko asmoz”. "Kontzienteak gara Uraren zuzendaritza berriak denbora laburra daramala karguan, baina horrek ez du esan nahi, auzokideen kezka helarazi eta, ondorioz, azalpenak eskatu ezin dizkiegunik. Jakin badakigu, aurreratutako jarduerak aurrera eramateko aurrekontua badagoela eta lanak egiteko aurretiko lizitazioa martxan jartzea baino ez dela gelditzen”, gaineratu du alkate getxoztarrak. Argazkian, urtarrilaren 27an izan ziren uholdeak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun