Bosgarren urtez antolatu du kanpoko pintura lehiaketa Zirri Marra elkarte sopeloztarrak
Igande honetan, irailak 13, bosgarren urtez egingo dute 16 urtetik gorakoentzako kanpoko pintura lehiaketa Sopelan, Zirri Marra elkarteak antolatuta eta Udalaren Kultura Sailaren laguntzaz. Halaber, bigarren urtez egingo dute haur pintura-lehiaketa. Parte hartzea eta teknika libreak dira. Gaiari dagokionez, Sopela irudikatu beharko dute margoek, baita herrian bertan egin ere. Aipatu lehenengo lehiaketari dagokionez, irabazleak 700 euro jasoko ditu, bigarrenak 600 euro, eta hirugarrenak 450 euro. Trofeo bana jasoko dute hirurek. Herriko partaiderik onenak ere saria izango du: 350 euro eta garaikurra. Haurren lehiaketak, berriz, hiru kategoria ditu: A kategorian 5 urterainoko haurrek hartuko dute parte; B kategorian, 6 eta 9 urte bitartekoek; eta azkenik, C kategorian 10 eta 15 urte bitartekoek. Epaimahaiak aukeratutako lanak udaletxeko erakusketa aretoan izango dira ikusgai irailaren 14tik 21ra.
Lanak zigilatzea igandean bertan egingo da Sopelako udaletxean, 9:00etatik 11:00etara egingo da. Marrazkien aurkezpena, berriz, 15:00etatik 16:00etara izango da. Sinatu gabe aurkeztu behar dira, zigilatzean emandako fitxa betearekin. Epaimahaia arte plastikoan adituak diren hainbat lagunek osatuko dute. Erabakia egun berean jakinaraziko dute , 17:00etan, udaletxeko plazan; baita sariak banatu ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun