Areetako Xake plazan izan diren kontzertu nagusietan, musika eskaintza anitza eta kalitatekoa izan da. Guztira, 5.000 pertsona inguru bildu da bertan lau egunetan zehar. Saio guztien artean, Pablo Milanes kantautore kubatarrarena nabarmendu behar da, sarrera guztiak agortu baitziren. Halaber, Xake karpa ia bete egin zen "Euskal Musika: 25 urte" saioan. Besteak beste, Oskorri Oreka TX, Maddi Oihenar, Niko Etxart eta Mikel Urdangarin aritu ziren agertokian. Kontzertu nagusien eskaintza Orchestre National de Barbesen raï doinuek eta La Bottine Sourianteren Quebeceko erritmoek osatu zuten.
Arratsaldeko kontzertuek, berriz, 4.000 bat lagun batu dituzte Itzubaltzeta / Romoko Santa Eugenia plazan. Aurten, Aragoiko O'Carolan taldearen musikaz, Murtziako La Banda del Pepo, Euskal Herriko Damba taldeen fusio-erritmoez eta Ruaille-Buailleren tradiziozko irlandar musikaz gozatzeko aukera izan dute ikusleek. Azkenik, egun bakoitzeko eskaintzari amaiera ematen zioten Munduko Terrazako saioek 1.800 bat lagun bildu dituzte. Bertan honako talde hauek jardun dira: Trilla (Katalunia-Andorra), Mauvais Sort (Quebec) eta Dumbala Canalla (Bartzelona, Herrialde Katalanak).
Bestelakoak
Jaialdian ez da haurrentzako ikuskizunik falta izan. Aurten arrakasta handia lortuta aritu da horretan Titiriteros de Binefar taldea, eskarmentu handikoa eta tradiziozko haur kantak berreskuratzen dituena, hain zuzen ere. Besteak beste, tailerrak, ludoteka bat eta ikuskizunak egon dira goizero. Bestalde, kale bandak ibili dira aurten ere; lau egunetan, kaleetan jardun dira atsedenik gabe eta. Pasa den larunbatean, milaka lagun bildu zituzten Bizkaiko Zubiko plazan hasi zen desfile ikusgarrian. Azkenik, gune solidarioa Folk Getxo BBK jaialdiaren gune arrakastatsuenetariko bat bilakatu da. Munduko eskulangintzak, Bidezko Merkataritza eta hainbat gastronomia bildu dira bertan, besteak beste. Halaber, Getxoko Udaleko Immigrazio Zerbitzuaren Kulturen Gunea eta zenbait elkartek eta GKEk antolatutako ekimen eta jarduerak ezinbestekoak izan dira aurtengo jaialdiaren arrakasta lortzeko. Guztira, desfileak eta aipatutako jarduerek 20.000 bat lagun bildu dituzte.
Getxoko Nazioarteko Folk jaialdian 30.000 lagun baino gehiago izan dira aurten, Getxoko Kultur Etxeak zabaldu duenez. "Euskal musika: 25 urte" saioak jarri zion amaiera atzo jaialdiari, musika festa handi batean. Bertan zenbait euskal musikari eta talde aritu ziren jaialdiaren 25 urteko jarduera ospatzeko. Lau egunetan, 12 saioz eta kale-banden desfileez gozatzeko aukera izan dute zaleek, jarduera solidarioak ahaztu gabe. Azken horien artean, Bidezko Azoka, Munduko Azoka eta Kulturen Gunea aipatu behar dira, jai-giroa eta kulturen arteko harremana bultzatu dituztenak. Lau egunetan ez da gorabeherarik egon eta eguraldia ezin hobea izan da jaialdiaz gozatzeko. Argazkian, Italiako Sbandieratori e Musici Citta de Floridia taldea atzoko saioan. Argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun