Ikasturte berrirako matrikulazio kanpaina aurkeztu du AEK-k

Gaur aurkeztu du 2009-2010 ikasturterako matrikulazio kanpaina Alfabetatze Euskalduntze Koordinakundeak (AEK). Ohi bezala, AEK-k maila guztietako euskara ikastaroak, homologatutako tituluak, taldeentzako ikastaro bereziak, barnetegietan ikastaroak, autoikaskuntza, on-line ikastaroak, glotodidaktika, material didaktikoaren diseinua, itzulpengintza zerbitzua, euskararen normalizazioa eta sustapenerako zerbitzua eta azkenik, euskaltegitik kanpoko tailerrak eskainiko ditu. Azken horien artean daude Berbalaguna egitasmoaren pareko mintzapraktikakoak. Horiez gain, aurten AEK-k berrikuntza nabarmena eskainiko die ikasleei, hala nola, maila gorenetan dauden ikasleek asteburuetan "Berria" egunkariko harpidedun izateko aukera izango dute prezio erdian. Eskaintza hau, erakunde biek lortu duten akordioari esker egingo dute. Gauzak horrela, AEKn izena eman nahi duen orok, hile honen amaierara arte izango du zabalik matrikulazio-epea. Argazkian, hainbat lagun glotodidaktika ikastaroan / cc-by-sa Andoni63.