Barrika Tenis Elkarteak hiru txapelketa desberdin egingo ditu irailaren 12tik 20ra bitartean. Lehenik eta behin, Barrikako Udala Tenis Irekia jokatuko da nagusien mailan. Dema gizonezkoen eta emakumezkoen kategorietan egongo da. Izena emateko epea bihar, hilak 9, amaituko da, 18:00etan. Bestalde, IV. Beterano Junior Tenis Txapelketa Soziala 35 urtetik gorako jokalariei zuzenduta dago. Gizonezkoen mailan jokatuko da soilik. Izena emateko epea bihar ere amaituko da, 18:00etan. Azkenik, Udazkeneko Padel Txapelketa Sozialaren hirugarren edizioa nagusien mailan jokatuko da, bai gizonezkoetan, bai emakumezkoetan. Padeleko abonua duten pertsonek eta Barrika Tenis Elkarteko kideek hartu dezakete parte. Izena emateko epea bihar amaitzen da, beste bi txapelketetan bezala. Izena emateko bi modu daude, telefono bidez aurrena: 607 669 073 edo 655 709 693 zenbakietara deituz. Hala, posta elektroniko bidez, alvila[abildua]euskalnet.net e-posta helbidera idatziz. Argazkian, hainbat lagun jokoan Barrikako padel pistetan / © Barrika.net.
Barrikako Udala Tenis Irekian, ostegunean egingo dute partidak zehazteko zozketa, 16:00etatik aurrera. Halaber, jokoaren hurrenkera hurrengo egunean emango da jakitera, hilaren 11n. Inskripzioaren kostua 15 eurokoa da eta nahitaezkoa da federazioaren lizentzia izatea. Partidak 3 setera jokatuko dira, tie-break-arekin. IV. Beterano Junior Tenis Txapelketa Sozialaren zozketa ere etzi egingo dute. Prezioa 12 eurokoa da eta, honetan ere, partidak 3 setera jokatuko dira, tie-break-arekin. Azkenik padel txapelketaren prezioa 20 eurokoa da bikote bakoitzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun