Gauzak horrela, "testigantza hauen aurrean duten jarrera zein den argi azaldu dezatela" eskatu die Euskal Herriko sindikatu, erakunde publiko eta alderdi politikoei Amnistiaren Aldeko Mugimenduak. Ildo horretan, Ertzaintzaren barnean "benetako diziplina faxista" ezartzen ari direla salatu du errepresioaren kontrako erakundeak, "une honetan Ertzaintza estrategia errepresibo basatiaren lehen lerroan jartzen ari direlarik".
Amnistiaren Aldeko Mugimenduaren salaketa:
Ares eta Lopezek marrazturiko jipoi eta eraso sexisten lekukotza gordin hauen aurrean salaketa argia egitea dagokigu. Zentzu honetan, Euskal Herriko sindikatu, erakunde publiko eta alderdi politikoei testigantza hauen aurrean duten jarrera zein den argi azaldu dezatela eskatzen diegu.
Ertzaintzaren barnean benetako diziplina faxista ezartzen ari dira, une honetan Ertzaintza estrategia errepresibo basatiaren lehen lerroan jartzen ari direlarik. Ertzaintzaren jardueraren gainean alarmak guztiak piztu beharrean aurkitzen gara, eta gure benetako kezka adierazi nahi dugu aurrerantzean jarrera honek ekar ditzakeen ondorioez.
Bederatzi izan ziren igandea eta atzo arteko gauean Ertzaintzak Lekeition atxilotu zituenak, Amnistiaren Aldeko Mugimenduak adierazi duenez. Errepresioaren kontrako erakundearen arabera, horietako bat adin txikikoa da eta atzo igaro zen epailearen aurretik, libre gelditu zelarik. Beste zortziak gaur igaro dira epailearen aurrera eta horiek ere libre utzi dituzte. Hiru fidantzapean gelditu dira libre, hauetako bi 3.000 euroko bermea ordainduta, eta bat 6000 euroko bermea ordainduta. Guztiek epaitegira joan beharko dute sinatzera astelehenero. Horretaz gain, atxilotuek tratu txarrak salatu dituztela zabaldu du AAMk. "Atxilotuetako zazpi gutxienez zaurituak daude eta parte medikua egin diete. Bostek atxiloketa oso bortitza jasan dutela salatu dute, hauetako bat konorterik gabe utzi zutelarik eta zuzenean ospitalera eraman zutelarik. Beste hiru jipoituak izan ziren komisariara bidean zein polizia egoitzan bertan. Zaurituak egon arren lau ordu baino gehiago izan zituzten egoera horretan ospitalera eraman aurretik. Gaur goizean bertan Durangoko komisarian beste atxilotuetako bat jipoitua izan da", azaldu duenez. Atxilotuetako neska bat "sexualki jazarria" ere izan dela salatu dute Amnistiaren Aldeko Mugimenduko iturriek: "gorputzean zehar ukitu zuten ertzainek", aipatu dutenez. Bi algortarren -20 urteko neska eta mutil bat- egoera zehatzaren berri ez du oraindik eman Uribe Kostako AAMk. Argazkian, abenduaren 28an Ertzaintza torturaren kontrako manifestazio bat geldiarazten Algortan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun