Erandioko auzo ezberdinetako bizilagunen "beharrak, aldarrikapenak, kexak eta iradokizunak lehen eskutik ezagutzeko" topaketa erronda abiatu berri du orain bi hilabete Mikel Arieta-Araunabeñaren lekukoa hartu zuen Jose Goikouria alkateak. Udal iturriek zehaztutakoaren arabera, "etengabeak izaten dira udalerriko toki ezberdinetako elkarteen eta tokiko erakundearen arteko kontaktuak, auzoekiko harremanen ardura daukan alkatearen albokoaren bitartez". Hala ere, udako geldialdiaren ostean, bere burua alkate berritzat aurkeztu nahi du Goikouriak, giro lasaian eta batzar formalak alde batera utzita. "Erandioztarrekin harreman zuzena eta hurbilagoa" sustatzeko asmoz, joan den igande goizean Enekuritik eman zuen paseoa alkate berriak, bertako bizilagunek lagunduta. Jaiak ere baziren bertan. Bi igande barru (irailak 20), berriz, Lutxana bisitatuko du udal agintariak, ondoren gainontzeko auzoei ekiteko. Argazkian, Joseba Goikouria.
Goikouriaren arabera, "lehentasuna" emango diote herriguneetatik urrunago dauden auzoak hobetzeari. "Ekonomikoki ez dira oso lan handiak, baina beharrezkoak dira", gaineratu duenez. Orain arte egindakoen artean ondokoak aipatu ditu alkate berriak: Lutxana, Arriaga eta Goiherriko eskolak hobetzeko lanak, azpiegiturak erabiltzen dituzten elkarteentzat egokituz; Lutxanako Gomaren Landa zein Martiartuko probalekua hobetzekoak; eta azkenik, Kukularrako San Agustin hilerrian eskailerak eta argiak jartzekoak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun