Portugaleteko Santa Maria abesbatzak emango dio hasiera jaialdiaren 23. ekitaldiari, habaneren eta itsas kantuen errepertorio zabala erakutsita. Abesten dituzten kantuen artean betiko abestiak, kantu berriak eta antzinakoen moldaketa berriak daude. Abesbatza 1978. urtean eratu zen, ahots mistoen talde gisa eta, ordutik hona, hainbat saio eskaini ditu Euskal Herri barruan zein kanpoan. Halaber, hainbat lehiaketatan parte hartu du eta 1984an eta 1985ean sariak irabazi zituen San Vicente de la Barquerako Habanera Lehiaketan. 2001ean bere lehenengo diskoa grabatu zuen: "Un puente hacia la ilusión", hain zuzen ere.
Bestalde, Berganti taldea 1982ko udazkenean sortu zen. Bere jarduera luzean 1.300 saio baino gehiago egin ditu, ez bakarrik Katalunia barruan zein kanpoan, baita Europan eta Amerikan ere. Egun arte, bost disko grabatu ditu. Gainera, 1988ko Calella de Palafrugelleko Cantadako diskoaren edizioan parte hartu du, 2000ko Mostra de l’Havanera Catalana ekitaldian (Palamos) eta 2001eko "Homenatge al mestre Ortega Monasterio" diskoan ere.
Kubako itsas doinuak
Amaitzeko, azken jardunaldian, Caracol taldea ariko da. Habanan sortu zen 1995ean, Kubako hiriburuko Habaneren Jaialdian bere obra aurkezteko asmoz. Han lortu zituen, alde batetik, Konposizioaren Saria "Habanera a ti" piezarekin, eta bestetik, talde onenari ematen zitzaion Interpretazioaren Saria ere. Arrakasta hori ikusita, kideek taldearekin jarraitzea erabaki zuten. Hasieratik, taldeak Kuban, Espainian, Mexikon, Venezuelan eta Italian aritu da, besteak beste, eta Iberoamerikako ahots-musikan eta instrumentu-musikan oinarritutako errepertorioa interpretatu izan dute.
Itsas doinuak izango dira protagonista nagusi Areetan, ostiral honetatik, irailak 11, igandera arte, Getxoko 23. Habanera Jaialdiaren eskutik. Portugaleteko Santa Maria abesbatza, Grup Bernganti kataluniarrak eta Kubako Caracol taldea ariko dira, Xake plazan, Getxoko Kultur Etxeak zehaztu duenez. Ohi bezala, saio guztiak 20:00etan hasiko dira eta sarrera doakoa izango da. Kontzertuez gain, publikoak "Getxo eta itsasoa" argazki erakusketaz gozatzeko aukera izango du. Erakusketa jaialdiko esparruan kokatuko da eta bertan, itsasoari lotutako zenbait irudi egongo dira ikusgai. Halaber, aurten ere Itsas Azoka izango da. Besteak beste, itsaskiak, bakailaoa eta kontserbak erosi ahal izango dira, Xake plazan. Azokaren ordutegia 17:00etatik 22:00etara izango da. Argazkian, ikusleak habanerekin gozatzen iaz Areetan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun