Getxophoto jaialdia 2007an sortu zen. Hirugarren edizioa da beraz eta hori da, hain zuzen ere, kartelean azpimarratu nahi izan dena. Kartelak 3 erraldoi bat harro erakusten du Getxophotoren logotipoaren gainean; pasadan urtean Stockholm-en (Suedia) ospatutako European Design Awards lehiaketan saria jasotako marrazkia alegia. Aurten ere, hirugarrenez, Alejandro Castellote izango da jaialdiko komisario lanak burutuko dituena. Bere begirada pertsonala Txina, Taiwan, Hego Korea eta Japon-etik datozen obretan islatuta ikusiko da, 2009ko obrak batzen dituen haria egun herrialde hauetan egiten denarekin bat baitator.
Bertsoak eta argazkilaritza uztartuz
Erakusketak hile osoan zehar ikusi ahal izango dira, irailaren 10etik urriaren 11ra arte. Jaialdiaren ekintza nagusiak, ordea, lehen asteburuan egingo dira. Lehen aipatu proiekzioarekin batera, Bertsophoto izeneko ikuskizunaz gozatu ahal izango da ostiral honetan, irailak 11, Algortako Zabala eskoletan. Ordua 21:00etan jarri dute, sarrera doan. Getxophotok antzinako ohitura eta argazkilaritza uztartzen dituen formatu berria garatu du. Peio Unzurrunzaga gai jartzaile dutela Igor Elortza, Aitor Mendiluze eta Jon Martin Getxoko kaleetan ikusgai izango diren argazki boteretsuenei buruz jardungo dira, bat-bateko bertsoak eskainiz.
Ostegun honetan, irailak 10, abiatuko da Getxophoto 2009, Alberto Garcia Alix-en “De donde no se vuelve” obraren proiekzioarekin. 2008an egindako 40 minutuko proiekzioa Areetako Andres Isasi Musika Eskolan egongo da ikusgai (gonbidapena eskuratu behar da aldez aurretik), 20:00etatik aurrera, autorea bera bertan izango dela. Getxophoto Nazioarteko Argazki Jaialdiaren 3. edizioan, Asiara bidaiatzeko gonbitea luzatuko digute. Txina, Hego Korea, Taiwan eta Japoniako argazkilarien lanak ikusiko ditugu herriko kale eta plazetan. Guztira, 20 erakusketa jarriko dituzte udalerriko kaleetan, "Asiako fikzioak" izenburupean, urriaren 11ra bitartean. Begihandi elkarteak antolatzen duen jaialdiak, aurreko edizioetako filosofia bera mantenduko du. Argazkigintzak museoetan, arte guneetan, galeria eta argitalpenetan izan ohi du bere erakusleihoa. Getxophotok, ordea, aukera hauek zabaldu nahi ditu "gune publikoak kaleak kultur gune eta formatu berrien ezagupenerako bide gisa erabiliz", aipatu dutenez. Era honetan, fatxada, erakustoki, plaza edota metroko geltokiak irudientzako euskarri izango dira. Argazkian, Algortako metro geltokian jarritako irudia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun