Esther Larrañaga Eusko Jaurlaritzako Ingurumen sailburu ohiak eta Iñaki Ezkurra erakunde bereko sailburuorde ohiak, biak Eusko Alkartasuneko kideak, auziperatu gisa deklaratu beharko dute Erandioko Asua auzoan egindako lindano zabortegi "ilegal eta klandestinoaren" auzian. "Berria" egunkariak zabaldu duenez, Bilboko 7. instrukzio epaitegiak arrazoia eman dio horrela Lur Maitea erakunde ekologistari. Lur Maiteak aspaldi aurkeztu zuen salaketa eta 1394/03 zenbakiko auzian Euskalduna zabortegian lindano bota izanaz gain, hondakin arriskutsuak Argalariora eraman ondoren zabortegiko eremua behar bezala garbitu gabe Prycari saldu eta merkataritza gune handia (egun, Carrefourrena dena) eraikitzen utzi izana ere leporatu zien Eusko Jaurlaritzari, Erandioko Udalari, Ihobe SA ingurumen kudeaketarako enpresa publikoari eta Edificaciones Industriales Asua SA (Edinasa) enpresari. Larrañagak eta Ezkurrak hilaren 21ean agertu beharko dute epailearen aurrean, haiekin auziperatuen kopurua bederatzi izatera helduko dela. Argazkian, Larrañaga / © Eusko Alkartasuna.
Sumarioa 2003an hasi bazen ere, lehenengo aferak 1995ekoak dira. Orduan, Edinasa enpresak Erandioko lur batzuk erosi zituen eta lehenengo lanak egin zituztenean, bertan 2.500 bat tona lindano topa zuten. Lindano hori Euskalduna zabortegira eraman zuten, 2002ra arte. Lur Maiteak salatu zuenez, lindanoa Europako Batasuneko funtsak jasotzen dituen Argalarioko zabortegira eraman ondoren, Euskalduna zabortegia ez zuten garbitu. Halere, lur horiek kutsatuta ez zeudela egiaztatzen zuen txostena sinatu zuen urte horretan Iñaki Ezkurra Ingurumen sailburuordeak. Horrela, Pryca nazioarteko enpresari lurrak saldu eta bertan merkataritza gune handia eraiki ahal izan zen. Ekologistek egindako salaketak, baina, 2006an baieztatu zuen Espainiako Toxikologia Institutuan. Dagoeneko Carrefour supermerkatua dagoen lurretan artsenikoa, kadmioa, nikela, beruna eta kromoa topatu zuten egindako azterketan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun