Enplegua sustatzeko zerbitzuak uztartzeko asmoz, izena aldatu diote Getxoko Behargintzari
Getxolan marka berria aurkeztu dute gaurko prentsaurrekoan Imanol Landa alkateak eta Aitor Soloeta Ekonomia Sustapenerako zinegotziak, hemendik aurrera Udalak alor horretan eskaintzen dituen zerbitzuak batzen dituena, alegia. Hartara, Enplegu eta Ekonomia Garapenerako Bulegoa (Behargintza) Getxolan deituko da aurrerantzean. Pertsona eta enpresei enplegu eta ekonomi sustapeneko zerbitzuak eskaintzen dizkieten eragileak anitzak direla ohartuta eta dauden baliabideak eskuratzea errazagoa egin aldera sortu dute marka berria, udal agintariek aipatu dutenez. Landaren hitzetan, ekimen honen helburua zerbitzu horiek bultzatu eta herritarren eskura ipintzea da, bereziki ekonomiak beheraldia bizi duen honetan. “Herritarrengana hurbildu nahi dugu 'leihatila bakarra' delakoaren bitartez, baita udalerrian ekonomi sustapen eta enpleguaren esparruan erreferente izatea ere. Hitz batean esanda, izen propioa sortu dugu, grafismo bereziarekin, eta berariazko eta egungoarekin bat ez datorren funtsarekin, zerbitzuaren publiko objektiboak-bezeroek erraz identifika dezaten”, esan du alkateak. Argazkian, Landa eta Soloeta Getxolan aurkezten.
Enplegu eta Ekonomiaren Garapenerako Laguntza Bulegoak hamar urtetik gora daramatza pertsona langabetuei, ekintzailei eta enpresei zerbitzua eskaintzen; "denbora guzti horretan enpleguaren eta ekonomi sustapenaren erreferente bihurtu da udalerrian", udal arduradunek aipatu dutenez. Jaio zenetik gaur arte, bulego honetan 13.000 lagunetik gora artatu dituzte, 6.500 enpresari zerbitzuak eskaini zaizkie, 242 enpresa berri sortzen lagundu dute, 1.821 pertsonek lana topatu dute eta 1.200 lagun baino gehiago trebatu dituzte Udalak antolatutako ikastaroetan, tokiko iturriek emandako datuen arabera. Horretarako, Landak esan duenez, "ezinbestekoa" izan da Bizkaiko Foru Aldundiarekin eta Eusko Jaurlaritzarekin harreman estua edukitzea eta eskualde edo Espainiako INEM erakundeak eta Europako Batasunak diruz lagundutako ekimenetan parte hartzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun