Barinatxeko aparkalekura eraman dute Arrietara hondartza inguruan zegoen autobus zaharra
Larrabasterrako Arrietara hondartzatik gertu, Itxasgane kale ondoko lursail partikularrean zegoen autobusa eraman zuten atzo, osteguna, Sopelako udal langileek. Motor gabeko ibilgailua El Pasillo surf elkarteak berriztatu zuen egoitza gisa erabiltzeko asmoz. Bi pisu dituen autobusa da, 14 tona ingurukoa eta 10 bat metroko luzerakoa. Alabaina, "Tokiko Ordenamendu Planak ezartzen duenari jarraiki, zonalde horretan ezin daiteke inolako eraikin edo azpiegiturarik kokatu. Urbanizagarria ez den ingurua eta itsasertzeko parkea da", tokiko iturriek aipatu dutenez. Hartara, zentzu horretan idatzitako udal dekretua aplikatu dute autobusa kentzeko. Josu Landaluce alkateordeak adierazitakoaren arabera, “Sopelan surfa indartzen ari gara eta ez da gure asmoa herrian dauden elkarte desberdinei oztopoak jartzea, baina instalazio horrek ezin zuen bertan egon”. Autobusa Barinatxe hondartzako aparkalekura eraman dute. Argazkian, udal langileak autobusa mugitzen / © Sopelana.net.
Ibilgailuaren jabearekin bilera sorta egin zen, udal arduradunak azaldu duenez, eta dekretu bidez zehaztu zen autobusa bertatik kendu behar zuela. "Erantzunik ez genuenez jaso, 48 orduko epea eman zitzaion bertatik eraman zezan, dekretu bidez berriz ere", Landalucek gaineratu duenez. Halaber, autobusa bertatik kentzen ez bazuen, Udalak berak horretarako beharrezkoak ziren neurriak hartuko zituela jakinarazi zitzaion. Gainera, horren kostua jabearen ardura izango zela esan zitzaion. Epe hori agortu ostean, atzo kendu zuten autobusa lursailetik eta Barinatxe hondartzako aparkalekura eraman zuten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun