Hiru emakumeren errautsak hartu ditu Bizitzaren Basoak
2009ko ira. 11a, 21:07
Atzo, osteguna, hiru emakume emaileren errautsak jaso ziren EHUko Leioa eta Erandioko campusean dagoen Bizitzaren Basoan. Zeremonia Espainiako Anatomia Elkartearen XXIV. Kongresuaren baitan, hiru emakume horiei eta euren senitartekoei eskerrak eman zitzaizkien. Emaileen ahaideez gain, ekitaldian egon ziren batzarkideak, Medikuntza Fakultateko ikasle eta irakasleak eta agintari akademiko eta profesionalak. Zeremonian, emaileen borondate ona eta eskuzabaltasuna nabarmendu zen, EHUko iturriek aipatu dutenez. "Izan ere, euren gorputzak ematean, Medikuntzako ikasleek eta beraz, etorkizunean medikuntzan lan egingo duten profesionalek, gaixotasun eta heriotzei aurre egiteko aukera ematen zaie", gaineratu dutenez. Bizitzaren Basoak gorazarre egin nahi die Zientziaren mesedetan euren gorputzak ematen dituzten horiei. Unibertsitateko arduradunen arabera, "beraiengatik ez balitz, Medikuntza irakastea ez litzateke posible izango". Gorputz horiek UPV/EHUko emaileen elkartearen bidez iristen dira fakultate horretara eta, egun, bi mila pertsona baino gehiago dira gorputz-emaile. Argazkian, atzoko ekitaldia.Gorputzak ezin direnean irakasteko erabili, erraustu eta errauts horiek kutxa batean sartzen dira. Horren ostean, hainbat aukera daude. Hainbatetan, emailearen familiak kutxa eduki nahi du; beste batzuetan, emaileak gura zuen lekuan uzten da; eta azkenik, emaile batzuk unibertsitateari ematen diote euren errautsak uzteko lekuaren erabakia. Abiapuntu horretatik sortu zen monumentuaren proiektua. Bertan, egun, 50 kutxa daude. "Modu horretan, Bizitzaren Basoa hilobi-monumentu moderno eta bakarra da. Izan ere, oso ezaugarri bereziak ditu, bai edertasun aldetik bai esanahi bereziaren aldetik", EHUk dioenez.. Basoaren barnean 200 emaile baino gehiagoren errautsak daude gordeta. EHUko plangintza estrategikoak "garrantzi berezia" ematen dio Bizitzaren Basoari. Horrela, epe laburrean hilobi-monumentu hori leku zentrala bihurtzea pentsatuta dago, honako guneez inguratuta: Arboretum-a, Lertutxeko urtegia, Akarlanda eta Campus Teknologikoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun