Jabekuntza Eskolaren helburua da "emakumeen partaidetza soziala eta politikoa sustatzea, historian zehar baztertuta eduki dituzten politika publikoetan eragina eduki dezaten", udal iturriek zehaztu dutenez. Horretarako, "partaidetza politikoa eta soziala" sustatuko du berriro. Horretaz gain, iazko ikasturtean izan ziren lau heziketa ildoak mantenduko ditu eskolak. Gainera, osasunari buruzko ikastaro berria martxan jarriko du. “Gai honekin emakumeen bizitza-kalitatea hobetzea lortu nahi dugu, gure gorputzei buruzko informazioa, ezagutza eta hausnarketaren bitartez; ondoren gure osasunari dagozkion gaiak guk geuk erabaki ahal izateko”, azaldu zuen atzoko aurkezpenean Keltse Eiguren Berdintasun zinegotziak. "Sexualitatea lehen pertsonan", "Emakume nagusien sexualitatea" eta "Zoru pelbikoa laguntzea" dira gai horren barruan eskainiko dituzten ikastaroak.
Komunikazio ildoan, berrikuntza bezala, hedabideen azterketa egingo dute, euskaraz eta espainolez, Kazetarion Berdinsarea erakundeko kideen eskutik. Horretaz gain, berriro ere landuko dituzte, euskaraz, jende aurrean hitz egiteko teknikak.
Emakumeen arteko topaketak
Munduko emakumeekin elkartasuna eta trukeari buruzko atala, lehenengoz, emakume etorkin eta bertokoen arteko topagunea izango da (otsaila eta maiatzaren arteko hileko azken ostegunetan). Horretarako ez da izenik eman beharko. “Herrialde desberdinetako emakumeak bilduko dira immigrazioari buruzko genero ikuspegiak agertzeko eta protagonisten bidez migrazio prozesuak eta esperientziak ezagutzeko aukera izango dugu”, adierazi zuen Berdintasun zinegotziak. Bestalde, Munduko emakumeek sortutako literatura eta komikiei buruzko tailerrak mantenduko dituzte eta emakumeei genitalak mozteari buruzko saioa eskainiko du Adriana Kaplan antropologoak. Gambiako emakumeekin egindako azterlanaren ondorioak azalduko ditu horrek.
Emakumeen nortasuna eta subjektibotasuna izeneko ildoan, honako hiru ikastaro berri eskainiko ditu: "Nire gorputzaren bila", "Genero identitate garaikideen eraikuntza" eta "Beti atzetik ditudan mamu femeninoak". "Emakumeok eta mamuak" ikastaroa ere berriro emango dute. Azkenik, feminismoari buruzko atalak, aurreko urteetan burututako autodefentsa tailerraz gain, beste bi ikastaro berri eskainiko ditu: "Irakurketa feminista literaturan", euskaraz, eta arte eta kritika feministari buruzkoa.
Osasunari buruzko ikastaroak eskainiko ditu aurten Getxoko Jabekuntza Eskolak
2009ko ira. 11a, 22:42
Osasunari buruzko gaiak eskaintzea izango da aurtengo Emakumeentzako Jabekuntza Eskolaren ikastaroen berritasun nagusia. Getxoko Udalaren Berdintasun Zerbitzuak antolatuta, 2009-2010eko ikasturtean guztira 262 toki eskainiko dira, 17 ikastaroetan banatuta; horietatik 10 berriak dira, eta erakusketa eta topagune bat ere izango dira. Aurrez izena emateko epea irailaren 14tik 21era egongo da zabalik, udaletxeko, Getxoko eta Itzubaltzeta / Romoko herritarren arretarako guneetan eta www.getxo.net webgunean. Lekuen zozketa, berriz, hilaren 22an izango da. Onartutako lagunen izenak 25ean emango dira ezagutzera eta matrikula egiteko epea irailaren 28tik urriaren 6ra arte egongo da zabalik. Ikastaroen prezioa 5 eta 15 euro artekoa izango da. Informazio gehiago 944 660 136 telefono zenbakira deituz eta berdintasuna[abildua]getxo.net posta elektronikora idatziz eskura daiteke. Haurtzaindegi zerbitzua ere egongo da eta EHUk aukera libreko kredituak emango dizkie ikastaroetan parte hartzen duten unibertsitate ikasleei. Argazkian, Keltse Eiguren Berdintasun zinegotziak aurkeztu zituen atzo ikastaroak.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun