Irailaren 16tik 30era Algortako Egunsentia haur eskola berrian matrikulatzeko epea zabalduko da, Getxoko Udalak jakinarazi duenez. Zentroa Foruak kaleko 14 zenbakian dago, San Inazio ikastetxearen ondoan, eta 0 eta 2 urte bitarteko umeentzat izango da. Haur eskola publikoak 2010eko urtarrilaren 11n irekiko ditu ateak. Matrikula udaletxeko, Getxoko eta Itzubaltzeta / Romoko herritarrentzako arreta bulegoetan egin daiteke. Eskaerarekin batera aurkeztu beharreko dokumentazioa honako hau izango da: errenta aitorpena edo Ogasun sailak horren beharrik eza egiaztatzeko ematen duen agiria (edo familiaren diru-sarrerei buruzko beste agiri batzuk); familiaren erroldaren agiria edo amaren edo aitaren lantokiaren kokapenaren agiria; umeak, aitak, amak edo anai-arrebaren batek ezintasunaren bat badu horren egiaztagiria eta, horrela izanez gero, guraso bakarreko familiarena; amaren eta aitaren lan egoeraren agiria; familia liburuaren fotokopiak (familia ugariaren egiaztagiria); langabeziaren egoeraren dokumentua; eta Osakidetzaren txartelaren fotokopia. Argazkian, Egunsentia zentroa lanetan.
Gainera, matrikularen eskaerak hilabeteko kuotak ordaintzeko erabiliko den banketxearen zigilua eraman beharko du. Informazio gehiago lortzeko Udalaren Hezkuntza Sailarekin (944 660 000) harremanetan jartzerik badago.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun