Arestian esan bezala, burutu beharreko distantzia 5.000 metrokoa da eta hondar gogorrean korrituko da. Lasterketak sei kategoria ditu: gizonezkoak, emakumezkoak, beteranoak (40 urtetik gorakoak), umeak (14 urtetik beherakoak), eta elkarteko naturistak, gizonezko eta emakumezkoen kategorietan banatuta. Umeak nagusiekin batera aterako dira, baina ibilbide laburragoa beteko dute. Lasterketa bukatzen duten parte-hartzaile guztiek oparia jasoko dute. Bestalde, kategoria bakoitzeko lehen hiru sailkatuentzat garaikurra egongo da.
Parte hartzaileek biluzik egin beharko dute lasterketa, hala ere, nahi izanez gero, txapela, eguzkitarako betaurrekoak, galtzerdiak eta oinetakoak jantzi ahal izango dituzte. Arau hori betetzen ez duten parte hartzaileek berehala deskalifikatuko dituzte eta antolatzaileek lasterketatik kanpora eramango dituzte.
Euskal Naturista Elkarteak (ENE) antolatuta, irailaren 19an, larunbatarekin, egingo da Patxi Ros Saria, Sopelako Lasterketa Nudistaren 11. edizioa. Ohikoa den legez, eguerdiko 12etan hasiko da proba, Barinatxe hondartzan. Hareatzeko alde sopeloztarretik abiatu ohi dira. Getxoko aldera ailegatzeko 5.000 metroko ibilbidea izango dute parte hartzaileek, hondar gogorretan, marea behean dagoela. Gaztetxoek, berriz, 2.500 metro egiten dituzte. Izena emateko epea ostegunean, hilak 17, amaituko da. Horretarako, ondoko bideak erabili beharko dira: e-mailez (carreranudista[abildua]ene-naturismo.org) edo lasterketako webgunean (http://ene-naturismo.org/carrera). Bestalde, lasterketaren egunean bertan ere izena eman daiteke, goizeko 11:30ak arte, Barinatxe hondartzan. Antolatzaileen arabera, nazioarteko kutsua izango du lasterketak, orain arte izena eman baitute hiru britainiar, frantses batek, italiar batek, irlandar batek eta alemaniar batek. Argazkian, lasterketa nudista Sopelan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun