Javier Otxoa txirrindulari berangoztarrak bi domina, urrezko bat eta zilarrezko beste bat, irabazi ditu joan den astean Italiako Bogogno herrian jokatutako errepideko txirrindularitza egokitutako munduko txapelketan. CP3 kategoriako erlojuaren kontrako proban munduko txapeldun bilakatzeaz gain, errepideko proban bigarren heldu zen helmugara Otxoa, igandean egindako lasterketan. Bere aurretik Darren Kenny britainiarra heldu zen, urrezko domina irabaziz. Hain zuzen ere, Pekingo Paralinpiar Jokoetan Kennyri berari irabazi zion erlojupeko proba berangoztarrak. Orduan ere, urrezko eta zilarrezko domina bana irabazi zituen Otxoak.
Javier Otxoa txirrindulari profesional ezaguna izandakoa da, baina 2001eko otsailaren 15ean, auto gidari batek bera eta bere anaia zapaldu zituen Malagako errepide batean. Javierri garun-paralisia eragin zion, Ricardo anaia hil zen bitartean. Auto gidariak 1.800 euroko isuna besterik ez zuen ordaindu behar izan, epaiketaren ostean. Baina tragedian ito gabe, Javier Otxoak eutsi zion txirrindularitzari eta istriputik ahal den neurrian osatu zenetik hona hainbat sari irabazi ditu, Paralinpiar Jokoetan urrezko dominak tartean. Udaberriro Punta Galea txirrindularitza taldeak Javier Otxoa Klasika antolatzen du. San Inazio egunean, berriz, ospatzen den Getxoko Zirkuitua Ricardo Otxoa zenari dedikatzen diote.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun