Ostiral eguerdian inauguratuko dute Getxoko Erdi Aroko Azokaren zortzigarren edizioa. Igandera bitartean, saltokiz, tailerrez eta hainbat jarduerez beteko dira Algorta erdialdeko kale eta plazak. Bertan, bisitariek hainbat produktu erosteko aukera izango dute, herri gastronomia ahaztu barik, kultur iturriek zehaztu dutenez. Gainera, artisauak lekuan bertan lanean ariko dira zuzen-zuzenean. Ohi bezala, ikuskizunak, zuzeneko antzezkizunak eta jarduerak egongo dira goizetik ilundu arte. Honako hau izango da azokaren ordutegia: goizez, 11:00etatik 14:00etara eta, arratsaldez, 17:00etatik 21:00etara. Larunbatean, 23:00etan itxiko da. Azokaren inguruan Erdi Aroko garaietako pertsonaia ugari ibiliko dira, antzerki aktoreek antzeztuta: bufoiak, malabaristak, koblakariak, musikariak, magoak, kontalari itsua, eskaleak, komedianteak, soldaduak, fakirrak eta suge-hezitzailea, besteak beste. Antzezpenak egingo dituzte, orduko azoketan zeuden giroa eta gertaerak erakutsiz. Argazkian, antzezleak iazko Erdi Aroko Azokan.
Ohikoa denez, zenbait gune egongo dira azokan. San Nikolas plazan Erdi Aroko kanpamendua eraikiko dute, denda, zalditegi eta abarrekin, eta hainbat saio eta ikuskizun egongo dira. Halaber, tabernetan eztarria busti ahal izango da eta, krepe-dendan, indarrak berritu. Haurrentzako gunea Zabala kalean eta ikastetxean kokatuko dute: ludoteka, tailerrak (grabatuak, egurra, marmol irudiak) eta arkulariak izango dira bertan. Tangora plazako txoko esoterikoan, berriz, igarpen artea eta magia izango dira nagusi: tarotistek etorkizunak dakarkiguna jakinaraziko digute. Bestalde, azoka arabiarra eta Erdi Aroko ogi labea Telletxen eta Kasinon egongo dira, hurrenez hurren.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun