Lekeition eta Bermeon izan dira orain arte euri zaparradarik handienak. Lehenengo orduetan 100 litro ur baino gehiago pilatu dira metro koadroko bi herri horietan. Ondorioz, kale eta errepidetan ur baltsak sortu, hainbat lonja urez bete eta zenbait etxe argi indarrik gabe geratu dira. Lekeitioko eskola bat hustu ere ere egin behar izan dute suhiltzaileek eta Markinatik Lekeitiorako errepideko errail bat itxita behar izan dute, baita Bermeorako bi sarrerak ere. Larrialdi zerbitzuak lanean ari dira orain arazoak konpondu nahian.
Hainbat gomendio
Egoera horren aurrean, Herrizaingo Sailak ibaietatik hurbil bizi diren hiritarrei zuhur ibiltzeko aholkatu die: euren ibilgailuak ibai ertzetatik gertu ez aparkatzeko eta euri jasak emanez gero, lonjak eta garajeak uzteko prest egoteko. Bestalde, herritar guztiei gomendatu die behar bezala informatuta egotea, norbere burua babesteko beharrezko neurriak hartzea eta ahal den neurrian itsasoan (eta orokorrean, naturan) ekintza arriskutsuak ez egitea. Era berean, errepidera ez ateratzeko gomendioa egin dute: eta hala egin behar zianez gero, ohi baino zuhurrago ibiltzeko, errepidean egon daitezkeen ur pilaketak eta lur-jausiak saihesteko.
Uholdeak egon daitezkeela eta, eguerdian martxan jarri du Larrialdi Plana (1 fasea) Eusko Jaurlaritzaren Herrizaingo Sailak. Euskalmet Euskal Meteorologia Agentziak jakinarazi duenez, Araba, Bizkaia eta Gipuzkoan alerta gorria jarri dute, batez ere kostaldean, metro koadroko 100 litrotik gora pilatzeko aukera dagoelako. Herrizaingo Sailaren arabera, "ibaien emariak alerta mailatik behera" jarraitzen dute oraindik. Hala er, 17:00etan itsasoko mareak gora egingo duen unean, arreta berezia jartzeko ohartarazi dute. Ertzaintza, Gurutze Gorria eta DYAko boluntarioak erne daude, erreskate lanetan beharrezkoak izatekotan. Horrez gain, udaletako eta bestelako larrialdi zerbitzuei eman diete alerta egoeraren berri, lagungarriak izan daitezkeelakoan. Bitartean, Krisi Mahaia osatu dute Bizkaiko SOS Deiaken eta Eusko Jaurlaritzako Larrialdi zerbitzuak, Bizkaiko Foru Aldundia eta hainbat udal deitu dituzte bilerara. Argazkian, larrialdi zerbitzuak Gobela inguruan, aurreko uholde batzuetan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun