Datorren astean, elikagaien erabiltzaile txartela lortzeko ikastaroa egingo dute Gorlizko kultur etxean. Izena emateko epea zabalik dago jada. Jakin beharrekoa da ikastaroa sukaldari, zerbitzari eta txikizkako merkataritza langileei zuzenduta dagoela. Lapiko artean dabiltzanek hilaren 22an, asteartea, izango dute lehen eskola, 17:00etatik 20:00etara; eta bigarrena ostegunean, hilak 24, ordutegi berean. Zerbitzariek saio bakarra izango dute, ostegunean, 9:00etatik 12:00etara. Azkenik, txikizkako merkataritzako langileek hilaren 22an, asteartea, izango dute lehen saioa eta, bigarrena, bi egun barru. Biak ala biak 15:00etatik 16:30era izango dira. Gorlizko sukaldarien ikastaroa bete-beterik dagoela jakinarazi du Adesa trebakuntza zerbitzuak. Hala ere, interesa daukatenek Lemoizko kultur etxean, Armintzan, izango dute egiteko aukera, urriaren 20an eta 22an, 17:00etatik 20:00etara. Bertoko eskolak sukaldarientzat izango dira bakar-bakarrik. Argazkian, sukaldari bat lanean / cc-by Javi Vte Rejas
Zerbitzari eta txikizkako merkataritza langilek 50 euro ordaindu beharko dute Gorlizko ikastaroetan parte hartu ahal izateko. Sukaldarientzat, berriz, 70 eurokoa da salneurria, Gorlizen zein Armintzan. Hala ere, Fundacion Tripartita erakundeak diru laguntza eskatzeko aukera emango die lanean dabiltzan ikasleei. Horren arabera, zerbitzari zein merkataritza langileek 7,5 euro jaso dezakete, eta 10,5 euro sukaldariek. Bestalde, Gorlizko Turismo Bulegoan izena emanda dutenek eta aipatu udalerrian edo Lemoizen lan egin edo erroldatuta daudenek %30eko deskontua izango dute. Beste batentzat lan egiten dutenek, berriz, %100 beherapena, hau da, sosik ez ordaintzea eska dezakete. Informazio gehiago eskatu eta izena emateko, 678 788 792 (Jon Lopez) telefono zenbakira deitu beharko dute interesdunek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun