Gurean egingo dute bihar Getxo eta Angeluren arteko kirol topaketa
2009ko ira. 18a, 20:35
Larunbat honetan, irailak 19, 400 lagun inguruk parte hartuko dute aurten gurean egingo den Getxo eta Angeluren (Lapurdi) arteko senidetze jardunaldian. Horietatik 300 kirolariak izango dira, udal iturriek zehatu dutenez. Ekimenak bere laugarren edizioa beteko du (bi egin dira toki bakoitzean) eta 2003an bi udalerriek sinatutako adiskidantza akordioaren testuinguruan kokatzen da. Bereziki, kirolaren bidez sustatu nahi dituzte mugaren alde bateko zein besteko herritarren arteko harremana eta elkar ezagutza; arduradun getxoztarren arabera, "ezaugarrien eta bokazio turistikoaren aldetik oso antzekoak" baitira biak. Gauzak horrela, igeriketa lehiaketa, pilota eta rugby partidak, surf erakustaldia eta estropadak izango dira. Jai egunari amaiera bikaina emateko, berriz, dantza erakustaldia, erromeria eta agur afaria antolatu dituzte. Argazkian, umeen arteko eskupilota partida, orain bi urte.Algortako Fadura kiroldegian 10:15ean izango den harrera aurreskuaren ondoren, kirol-jardunaldiari hasiera emango diote, gazteen arteko igeriketa lehiaketa eta pilota partidekin. Horretaz gain, Getxo Artea rugby taldeko jokalari beteranoak lapurtarren aurka ariko dira, 11:30ean. Arratsaldean, 15:00etan ekingo diete berriro kirol jarduerei, helduen arteko eskupilota partidekin. Ondoren, 16:00etan, Getxo Surf taldeko kirolariak Angeluko ordezkarien aurka ariko dira Barinetxe hondartzan. Beteranoen estropadak ere izango dira, 17:45ean, Algortako Portu Zaharrean. Bertan, ondokoak arituko dira: Hendaia, Arkote, Getxo, Ibaialde, Sestao eta Lutxana. Horiek bukatuta, 18:15ean, Portu Zaharrean, dantzak eta erromeria izango dira. Jardunaldia Fadurako garagardotegian amaituko dute, sari-banaketarekin, 19:45ean, eta agur-afariarekin, 20:00etan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun