Herrizaingo Sailaren arabera, ibaien ubidea segurtasun mailaren barruan mantentzen da oraingoz. Hala ere, zenbait ibaik, Butroe ibaiak esaterako, maila hori gainditu eta BI-634 errepidea itxi behar izatea eragin du, Gatika parean, goizaldean, 3:30etik 10:15ak aldera arte. Gobela erreka inguruan ez dago arrisku handiegirik, egun hauetako euri zaparradei dagokienez behintzat, inguruko bizilagunek UKBERRI.NETi adierazi diotenez. Hala ere, urduritasuna nabaria da Salsidu, Zubilleta eta Neguri Langileko auzotarren artean, udazkena gainean daukagula eta lanak oraindik hasi ez direla ikusita.
Lur jausiak
Datozen egunotan lur-jausien arriskua areagotu egingo da zenbait errepidetan, bereziki kostaldetik hurbil aurkitzen direnean. Hortaz, Herrizaingo Sailak errepideetan zuhurtasuna areagotzea eskatzen die gidariei.
Ibaiak zaintzen jarraituko dute momentuz
2009ko ira. 19a, 19:57
Uholdeen aurkako Larrialdi Plana alertako lehenengo fasetik 0 fasera (ubideen zainketa eta jarraipen fasera) pasatu da, Eusko Jaurlaritzaren Herrizaingo Sailak jakinarazi duenez. Euskalmet Meteorologia Euskal Agentziaren iragarpenen arabera, gaur, larunbata, Kantauri isurialdeko zenbait puntutan, ordu betean 15 litro ur biltzeko euri zaparradak bota ditzake. Hori dela eta, Herrizaingo Sailak larrialdi zerbitzua abian mantenduko du. Bitartean, Getxoko Erdi Aroko Azoka egiten ari zela, dozenaka herritarrek egin dute manifestazioa Algortako kaleetan barrena, Gobela inguruan uholdeak saihesteko premiazko lanak ahalik eta lasterren egin daitezela eskatzeko. Ondoren, Telletxen egin dute elkarretaratzea. Bihar ere egingo dute kontzentrazioa, igande guztietan bezalaxe, obrak hasi artean. Baina, oraingo honetan, Getxo I institutu alboko parking-ean batuko dira, 12:00etan. Argazkian, hainbat lagun pankartari eusten gaurko elkarretaratzean. Argazki gehiago ikusteko sakatu hemen.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun