Ostiral eguerdian indarrean jarritako Uholdeen aurkako Larrialdi Plana atzo, larunbata, iluntzean bertan behera utzi zuen Eusko Jaurlaritzaren Herrizaingo Sailak, ekaitzak gutxitu egin direla eta. Beraz, metro koadroko 15 litrotik gora jasotzeko arriskua iragartzen zuen alerta horia amaitutzat eman zuten. Dena den, euri zaparrada txiki-ertainez ohartarazi zuten. Bitartean, gaur ere, Aldapa, Zubilleta, Salsidu, Fadura, Neguri Langile eta Larrañazubi auzoetako ehun bat bizilagun batu dira Algortako Ollarretxe errepideko errotondan, Gobela erreka ertzeetan uholdeen arriskua murriztuko duten lanak has daitezen eskatzeko, eta udal zein autonomi erakundeen "utzikeria" salatzeko. Protestak igandero errepikatuko dira "zulakariak Gobelan ikusi artean", adierazi dutenez. Hurrengo hitzordua, beraz, irailaren 27an da, eguerdiko 12etan. Bertako auzotarrek getxoztar guztiak gonbidatu dituzte parte hartzera. Argazkian, hainbat auzokide pankartari eusten, gaurko protestan / © Arantza Gutierrez. Argazki gehiago ikusteko sakatu hemen.
Iñaki Urrizalki Uraren Euskal Agentziaren zuzendari berriak ostegunean Imanol Landa alkateari aipatu zionez, lanak agintzeko lehiaketa publikoa irailaren 30ean iragarriko dute Bizkaiko Aldizkari Ofizialean. Hori horrela, asteetan atzeratu daiteke obren hasiera. Horrelako proiektuen tramitazio prozesua kontuan hartuta urtarrilera arte, agian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun