Athleticekin lehenengo mailan egin du debuta gaur Aketxe getxoztarrak
2009ko ira. 20a, 23:52
Arenas eta Athletic futbol taldeek indarrean daukaten hitzarmenari esker, denboraldi hasieran heldu zen Lezamara Isaac Aketxe Barrutia jokalari getxoztarra, Bilbao Athleticekin Espainiako Futbol Ligaren 2. B mailan jokatzeko. Bada, kategoria horretan bi partida egin ostean, gaur egin du debuta lehenengo mailan Aketxek. Vila-real taldearen aurka San Mamesen jokatutako norgehiagokan, gandor iliakoan kolpea hartu duen Fernando Llorenteren ordez sartu da futbol zelaian 20 urteko jokalaria, 79. minutuan. Minutu gutxi eman badizkiote ere bere joko ona erakutsi du aurrelari getxoztarrak. Esaterako, 90. minutuan Gaizka Toquerori eman dio azken pasea Aketxek, talde osoak harilkatutako jokaldi bati amaiera emateko asmoz. Hala ere, balio Vila-realeko ateko zutoinetik urrun joan da. Luzapenaren hirugarren minutuan, berriz, falta egitez gelditu behar izan du Aketxe Angel Lopezek. Horregatik, txartel horia atera diote atzelari vila-realdarrari. Azkenean, Athleticek 3-2 irabazi dio Vila-reali. Argazkian, Aketxe Lezaman entrenatzen (eskuineko azkena), Bilbao Athleticen aurkezpenean / © Athletic ClubIsaak Aketxe Arenas taldean hasi zen futbolean 1998an, 10 urte zituela, eta bertan egin zuen denboraldi osoa. 1999-00tik 2003-04ra arteko denboraldiak Athleticen kimuen, haurren eta kadeteen taldeetan egin zituen getxoztarrak. Zurigorrien kadete taldean aritu eta bi urtetara bueltatu zen gorri-beltzekin Aketxe, 2006-07 denboraldia Arenasen gazteekin eta hurrengo hirurak, talde nagusiarekin, 3. mailan aritzeko. Orain, berriz, 2. B mailan jokatzeko fitxatu du Athleticek. Hala ere, badirudi Joaquin Caparros entrenatzaileak talde nagusian jokatzeko aukera emango diola.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun