Algortan jarriko dute aste honetan "Fotorretro" erakusketa
2009ko ira. 21a, 14:02
Irailaren 23tik 30era bitartean, “Fotorretro Getxo 2009” argazki erakusketa hartuko du Algortako Telletxe plazak. Bertan, 250 argazki baino gehiago egongo dira ikusgai, San Nikolas Liburutegiko bildumatik hartuak, Getxoko Kultur Etxeak jakinarazi duenez. Erakusketak etenik gabeko ordutegia izango du. Argazki horietan, Getxo eta getxoztarrak aro ezberdinetan ezagutuko dituzte bisitariek: XX. mendeko lehen urteetatik gure egunetara arte, alegia. Oraingo honetan, Algorta herriko argazkiek eta argazki-artxiboaren bildumari eginiko azken ekarpenek protagonismo berezia izango dute, antolatzaileen arabera. Getxoko argazkien artxiboan partikularrek eginiko ekarpenak eta dohaintzak daude. Nahi duenak San Nikolas plazako liburutegian eman ditzake argazkiak. Bertan, kopia digitalizatua egiten dute eta originala jabeari itzultzen diote. Argazki-artxiboa, sortu zenetik, apurka-apurka hazi da. Gaur egun milaka argazki dago. Argazkian, lagun ugari irudiei begira Telletxe inguruan, aurreko batean.Getxoztarren laguntza ezinbestekoa da erakusketako argazkietan ageri diren pertsonak eta lekuak identifikatzeko, tokiko kultur iturrien hitzetan. "Horretarako, erakusketan koaderno bat jarriko dugu. Bertan, jendeak informazioa eman dezake, datak zehaztu, pertsonak identifikatu, eta abar", zehaztu dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun