La Casa del Perro enpresak jasoko ditu, hemendik aurrera, Leioako kaleetan galduta, solte edota euren jabeen kontrolik gabe aurkitzen diren animaliak. Abereen bilketa eta zaintza zerbitzua horri eman dio tokiko Udalak, 35.000 eurotan, bi urtez. Hala ere, kontratua bi urte gehiago luzatzeko aukera dago, tokiko iturrien arabera. Zerbitzua urteko 365 egunetan, 24 orduz, egongo da indarrean. Abisu bat jaso eta gero, gehienez, 30 minututan agertuko dira txakurzainak zehaztutako tokian. Segituan aterpetxera eramango dute animalia eta, bertan, parasitoak hil, desinfektatu eta behar bezala garbituko dute, kutsadurak saihesteko. Prozedura horren ostean, identifikazio txip-a kontsultatuko dute eta jabeekin harremanetan jarriko dira bere bila pasatzeko. Dena dela, abereren batek ostatuan izateko epe legala agortzen badu adopzio prozesuan sartuko da: inoiz ez da beste biderik erabiliko, udal iturriek aipatu dutenez. Beraz, ez omen dituzte hilko. Gauzak horrela, euren animaliaren bila dabiltzan jabeek zein baten bat hartzeko asmoa daukatenek datu basea daukate ikusgai, ondoko webgunean: www.lacasadelperro.es. Argazkian, katutxoa.
Bestalde, hiru hilabetean behin, hiru eguneko erronda egingo du enpresa berriak, Leioan zehar solte diren txakur gehien batzen diren zonaldeetatik. Horretaz gain, La Casa del Perrok animalien ostatua dauka jabe partikularren esku, oporraldietan bere animaliak ondo zainduta utzi nahi dutenentzat. Sopelan dago hori. Aipatu instalazioetan klinika ere badaukate, kalean harrapatzen dituzten abereei harrera egin eta albaitariek artatzeko. Bestalde, ikastaro bi jarriko dituzte martxan urtean zehar, Leioako txakurren jabeei zuzendutakoa, kontzientziazioa eta behar bezalako elkarbizitza sustatzeko asmoz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun