Txiki, Otaegi eta beste gudari antifaxistak omenduko dituzte Derion larunbatean
2009ko ira. 23a, 21:17
Ahaztuak 1936-1977 elkarteak hainbat deialdi egin du datozen egunotan 1975ean fusilatutako gudari antifaxisten omenez, tartean larunbatean Derion. Orain dela 34 urte, 1975eko irailaren 27an, ETAko Angel Otaegi eta Jon Paredes "Txiki" eta FRAP-eko Xose Humberto Baena, Ramon Garcia Sanz eta Jose Luis Sanchez Bravo erail zituzten, legalki bada ere, Frankismoaren exekuzio pelotoiek. Izan ere, aurretik erregimen frankistaren epaitegi militarrek gerra kontseilu sumarisimoetan kondenatu zitzuten eta Ministroen Kontseiluak heriotza zigorrak baieztatu zituen. Diktaduraren azken bost erailketaren urtemuga dela eta, Ahaztuak 1936-1977 elkarteak omenaldia eskainiko die "Estatu Frankistak egun hartan eraildako bost gudari antifaxistei zein erregimen berak horiek baino lehen eraildako milaka eta milaka pertsonei". Larunbatean, irailak 26, Derioko hilerrian eta Iruñean izango dira ekitaldiak. Igandean, berriz, Gasteizen eta Zarautzen. Argazkian, iaz Iruñean egindako ekitaldia / © PCE (m-l).Derioko ekitaldiari dagokionez, arratsaldeko 6etan burutuko da herriko hilerrian. Ahaztuak elkartetik gogoratu dutenez, "Frankistek Bilbo 1937ko ekainean hartu ondoren, kolpistek hiriburua eta inguruak ikaraz estali zituzten, ehunaka errepublikano eta abertzale atxilotuz, hasieran, eta fusilatuz, ondoren. Derioko hilerria hilketa gune makabroetako bat izan zen eta bere horman ehunaka miliziano eta gudari fusilatu zituzten. Bizkaian errepresio frankistak 1.000 bat pertsona hil zuela uste da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun