"Guztiok bat" leloarekin "gizarte moduan datozen hil hauetan gainditu beharko ditugun erronkei aurre egiteko gure konpromisoa eta gure apustua adierazi nahi dugu, eta baita erronka horiek gainditzeko beharrezkoa den batasuna ere", transmititu nahi dutela adierazi du Greaves-ek. Krisialdia, herri mailako gure garapena", autogobernua eta, "jakina, bakearen eta ETAren etenik gabeko deslegitimazioaren erronkak" gaineratu ditu EBBko idazkariak.
EBBren idazkariak azaldu duenez, "Alderdi Eguna aurten bete diren egun historikoak ospatzeko abagunea izango da. 30 urte bete dira Leizaola Lehendakaria itzuli zenetik; bete gabe jarraitzen duen Gernikako Estatutuak ere 30 urte bete ditu. Bi data horiek gakoak dira Herri honen historian".
EGI kanpaldiaren eta Alderdi Egunaren egitaraua:
Irailaren 25an, ostirala
- Kanpaldi hasiera
- Parrilada
Irailaren 26an, larunbata
- Ekitaldi politikoa
- Herri bazkaria
- Mus Txapelketa, 15:00etan
- Bildots errea afaria
- Sagardo kupela, 21:00etan
- Akerbeltzen kontzertua, 23:00etan
Irailaren 27a, igandea
- Ongi etorria, 10:00etan
- Meza (Hizlarien tribuna aurrean), 10:30ean
- Agintarien eta UBBetako lehendakarien desfilea, 11:15ean
- Ikurriña omentzeko mosaiko erraldoia
- Ekitaldi politikoa Iñigo Urkullu EBBren presidentearekin, 12:00etan
- Herri-kirolak, 13:15ean
Karpen ordutegia:
Txiki-Txoko: 10:00etatik 14:30etara eta 15:30etatik 18:30etara
Disko Festa: 16:30etatik - 18:30etara
Alderdi Eguna aurkezteko Belen Greaves EBBko idazkariak emandako prentsaurrekoaren bideoa:
Euzko Alderdi Jeltzaleak alderdiko festaren 33. edizioa ospatuko du igande honetan. Ohikoa denez, Forondako zelaietan milaka eta milaka alderdikide, jeltzale eta jarraitzaile batzea espero du antolakuntzak, ahal bada garraio kolektiboetan joana, batzokietan antolatutako autobusez, alegia. Berrikuntza batzuk izango dira Alderdi Egunaren edizio honetan, eta EAEko Lehendakaritza galdu izanaren ondorioz, EBBko presidentea den Iñigo Urkulluk baino ez du mitina emango. Desfileari dagokionez, aurten, agintariekin batera Uri Buru Batzarretako presidenteek besterik ez dute martxan parte hartuko. Era berean, EAJk indar erakustaldia egingo du, horretarako "milaka pertsonen ahaleginari esker sortuko den ikurrina" izango da bertan, ondoren helikopterotik irudiak ateratzeko. Belen Greaves EBBko idazkariaren arabera, "milaka eta milaka esku anonimok eratuko duten ikurrina munduko toki guztietan jakin dezaten Euskadi nazio bat dela, nazio bat garela. Herri bat garela. Eta Alderdi honek bizitza eta etorkizuneko konpromiso bat duela Herri honekin". Hori posible egiteko, "100.000 kartel gorri, zuri eta berde prestatu dira ekitaldi politikoa hasi baino minutu batzuk lehenago ikurrina egiteko". Mitina eta ekitaldia nagusienak Internetez zuzenean jarraitu ahal izango dira alderdiko telebistari esker, Microsoft-en Windows Media aplikazioa izanez gero. Euzko Gaztediri dagokionez, ostiralean, 18:00etan emango diote hasiera EGI kanpaldiari, "Independentzia aldarrikatu, bultzatu, lortu!" lelopean. Argazkian, Iñigo Urkullu Areetan emandako mitin batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun