Besteak beste, bihar, ostirala, Aitzama erromeria taldeak soinu banda jarriko die jaiei eta hurbiltzen direnak dantzan jarriko ditu, Txopoetan. Larunbatean, aldiz, Lotxo taldeko lagunak izango dira giroa sortzeaz arduratuko direnak. Auzoko jaiak diren arren, giro ederra sortu ohi da Txopoetan. Bitartean, Areetan, Beste Bat taldeak alaituko du zapatuko gaua, Getxoko Udalak bere webgunean zabaldutako egitarauan Trikizio aipatzen den arren.
Ikusi Areetako Skalimotxo taldeak orain bi urte egindako playbackaren bideoa:
Mesedeetako Ama eguna gaur, osteguna, bada ere -jai eguna aurten Getxo udalerrian-, ostiral honetatik igandera bitartean ospatuko dira Areetako jaiak. Horrenbestez, aitona-amonek emango diete hasiera festei, bihar, 13:00etan, Eskoletako plazan (lehengo Ipotxen plaza) bertan izango duten luncharekin. Hasiera "ofiziala", berriz, 17:30ean egingo dute, Skalimotxo gazte koadrilak -iazko irabazleak- txupina botata. Arratsaldean zehar, txistulariak, buruhandiak eta dantzaldiak (22:30ean, Hakker taldea) bata bestearen atzean joango dira, jaien lehenengo eguna betez. Areetako Mesedeetako Amaren jaietako ohiko ekitaldiez (hareaz eginiko irudien lehiaketa Erika Pedrosaren omenez, barraskilo lapiko eta paella lehiaketak...) aparte, aurten lehenengo urtez egingo dute xake topaketa; larunbatean, 16:30ean. Gainera, aurten, Xake plazan jarri dituzte barrakak. Bitartean, Leioako Txopoeta auzoan, asteburuan ez ezik, asteartean (irailak 29) ere izango da jai, San Miguel egunean, alegia. Argazkian, Skalimotxo taldeko kideetako bat orain bi urteko playbackean, Areetako jaietan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun