Getxoko Udalak bertan behera utzi du, "behin betiko", La Terraza izeneko proiektua, tokiko PPk "Ereagako bunkerra" ezizena jarri diona. Udal iturriek zehaztu dutenez, "beste proposamen berri baten alde egingo dugu, adostasun gehiago izango duena eta, edozein kasutan ere, Udal Turismo arloak eta bertoko hondartzako zerbitzuek dituzten beharrei erantzuna emango diena". Proiektuari uko egiteak, eraikinaren eraispena aurrera ez eramateaz gain, aldez aurretik adostutako kontratu tekniko guztiak bertan behera geratzea suposatuko du, udal arduradunen arabera. Hori dela eta, Algortako Ereaga hondartzan erabilera anitzeko eraikina egiteko lehiaketa irabazi zuen proiektua ez da aurrera eramango. Udalak La Terraza kafetegia bota eta azpiegitura berria eraiki nahi zuen horren lekuan, turismo bulegoa ez ezik, taberna-jatetxea eta ondoan dauden sorosle eta hondartzainentzako tokiak ere jartzeko. Hala ere, Getxoko PPk aurkako egin zion egitasmoari; baita, aurreko datuen arabera, sinadura aurkeztu zuten 1.071 auzotarrek. Herenegungo udal batzarrerako ere proiektua geldiaraztea eskatzeko mozioa aurkeztua zeukaten tokiko popularrek. Hala ere, hori eztabaidatu baino lehen eman zuen hartutako erabakiaren berri Getxoko Udalak. Argazkian, Ereagako La Terraza kafetegia.
Abenduan iragarri zuen Imanol Landa alkateak La Terraza kafetegiko proiektua "behin-behinean" gelditzeko erabakia. Hala ere, horrek ez zuen Getxo PP lasaiago utzi. Besteak beste, Ereagako "bunkerraren" proiektua adostea egotzi zieten EAJ eta PSE-EEri. Aipatu erabakia berretsi egin du orain Landak, "udal talde politikoen artean erantzun positiboa ez zegoela ikusita, proiektua guztion adostasunarekin aurrera eraman ahal izateko". Udal Gobernu Taldeak beste aukera berri batzuk aztertzen ari da jada, "informazio turistiko eta arreta zerbitzuak ahalik eta kalitate handienarekin eskaini ahal izateko eta udalerriari dagokion irudi ona eman ahal izateko", aipatu dutenez. Orain Turismo Arloko zerbitzua aurrefabrikatutako modulu batean eskaintzen ari da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun