Bitxilore aisialdi elkarteak antolatuta, larunbat eta igande honetan Erdi Aroko Azoka jarriko dute, Altzagako oinezkoentzako kaleetan eta Irailaren 23a plazan. Santi Neira Kultur zinegotziak zehaztuta duenez, ez da Erandion horrelako jarduerarik antolatzen duten lehenengo aldia; bai, ordea, Bitxilorek antolatzen duena. Dagoeneko 50 artisauk baieztatu dute bertan izango direla, eta baliteke azken orduan gehiago etortzea, tokiko iturrien arabera. Hartara, hainbat produktu dastatu eta erosi ahalko dituzte bisitariek: larruzkoak, argizarizkoak, zurezkoak, urrezkoak, jostailuak, oinetakoak, sendabelarrak, txerrikiak, gazta, gozokiak... Horrekin batera, kalejira, malabarista, performance eta gaueko su ikuskizunez gozatzeko aukera egongo da, Madrilgo Losinfuste taldearen eskutik. Ordutegiari dagokionez, 10:30etik 14:00etara eta 18:00etatik 22:00etara egongo da zabalik. Argazkian, su ikuskizunak ere izango dira gauez.
Azoka arabiarra eta merkatuarekin batera, baserri abereentzako gune berezia egongo da. Besteak beste, ardiak, ahuntzak, ontziak, txerri nanoak, oiloak eta antzarak izango dira ikusgai bertan. Azken horiek azokan zehar ibiliko dira paseoan. Haurrek ere astotxoen gainean joateko aukera ere edukiko dute; baita falkoneria ikuskizunaz gozatzeko ere. Azkenik, sabelak betetzeko, erretegia, sagardotegia, krepe-denda eta pizzeria izango dira Erandioko Erdi Aroko Azokan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun