Joan den astelehenean egindako agerraldiaren bitartez adierazi zion babesa hautagaitzari Imanol Landa alkateak. Hain zuzen ere, 3.000 euroko diru-laguntza eman du Getxoko Udalak Workshop edo nazioarteko batzar hori egin ahal izateko. Bertan, Estatu Batuak, Italia, Suitza, Espainia eta Euskal Herriko hainbat lekutatik etorritako 25 ikertzaile parte hartzen ari dira. Haiek erabakiko dute Gorrondatxe edo Agost (Murtzia, Espainia) estratotipo izendatzea. Landak, prentsaurrekoan esan zuenez, “atsegin handia da baieztatzea Getxoko kostaldea, eta konkretuki Gorrondatxe hondartza, ez dela inguru ederra soillik, non apo lasterkaria bizi den. Euskal Herriko Unibertsitateko ikertzaileek urtetan egindako lanari esker, agerian geratu da bere garrantzi historikoa eta geologikoa". Alkatearen hitzetan, "gai horiek ikasi aldera, nazioarteko mapan jartzen gaitu horrek, orain dela urte batzuk Zumaian gertatu zen bezala”.
Etorkizuna aurrez ikusteko baliagarri
Xabier Orue-Etxebarria EHUko Paleontologia katedraduna eta aipatu unibertsitateko Estratigrafia eta Paleontologia Saileko ikerkuntza-taldekidea izan zuen lagun udal agintaria, aste hasierako agerraldian. Ikertzaileak gogora ekarri zuen Gorrondatxe hondartzako itsaslabarretan azaleratzen diren arrokak itsaso sakonean metatu zirela, gutxi gora behera duela 48,6 milio urte. Bere ustez, garai horietako munduko ebaki geologikorik onena litzateke Azkorrikoa: Ypresiar eta Lutetiar mugan, Eozenoaren hasieran eratu ziren materialak aztertzeko "ezin egokiagoa". EHUko doktore Aitor Payrosek gaineratu zuenez, "oso garrantzitsua" da estratotipo ezberdinak ikastea, esaterako, baliabide naturalen arloan (hidrokarburoak ...) eta arrisku naturalen arloan (uholdeak, aldaketa klimatikoa ...). “Artxibo geologikoek denboran atzera joatea ahalbidetzen digute, katastrofe natural baten ondoren gertatu diren ezbeharrak ezagutu. Beraz, etorkizunean, antzeko bat gertatuko balitz, ondorioak zeintzuk liratekeen aurretik jakingo genuke”, azaldu zuenez.
Mundu osoko zientzialarien azterleku bilaka daitezke Gorrondatxeko itsaslabarrak
Goizeko 9etan abiatu dira gaur, Algortako Igeretxe hotelean, Nazioarteko Estratigrafia Batzordearen topaketak. Getxoko Gorrondatxe hondartzan (Azkorri izenaz ezagunagoa) azaleratzen den arroka multzoa estratotipo izendatzeko hautagai gisa aurkeztu du bertan EHUko Zientzia eta Teknologia Fakultateko Ikerketa Taldeak. Zera esan nahi du horrek: Lurraren garai geologiko bat aztertu ahal izateko munduko erreferente izendatuko lituzkete Gorrondatxeko itsaslabarrak. Kasu honetan, Eozenoari dagozkion Ypresiar eta Lutetiar estai geologikoen arteko muga ikertzeko. Horrenbestez, Zaragozako Unibertsitateak proposatutako Murtziako Agost herriko sekzioarekin lehiatu beharko dira harkaitz getxoztarrak. Aukeratuko balute, eta IUGSk (International Union of Geological Sciences) oniritzia emango balu, Gorrondatxeko sekzioa adin horretako materialak aztertzen dituzten munduko zientzialari guztientzat bisitatu beharreko leku bihurtuko litzateke. Orain dela 4.600 milioi urte inguru sortu zenetik, planetan izan diren gertakari gehienak sekzioa osatzen duten arroketan jasota geratu dira, adituek diotenez. Erabakia bihar eguerdian emango dute ezagutzera. Argazkian, Imanol Landa alkatea, Aitor Payros EHUko doktorea eta Xabier Orue-Etxebarria EHUko Paleontologia katedraduna, alderik alde, joan den astelehenean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun