Lekua badago oraindik Getxoko Jabekuntza Eskolaren euskarazko ikastaroetan izena emateko
Emakumeentzako Jabekuntza Eskolak aurten euskaraz eskainiko dituen ikastaroetan izena emateko epea epea luzatu egin du Getxoko Udalaren Berdintasuneko Zerbitzuak. Neurri horrekin, ikastaro horietan oraindik geratzen diren plazak bete nahi dira, udal iturriek zehaztu dutenez. Horrenbestez, asteazken honetara arte, irailak 30, edukiko dute apuntatzeko aukera emakumeek. Ikastaroak honakoak dira: “Jende aurrean hitz egiteko teknikak”, “Emakumeok komunikabideetan” eta “Irakurketa feministak literaturan”. Oraingoan interesatuek beren izena Berdintasuneko Zerbitzuan bertan, Aiboa institutu ohian, berdintasuna[abildua]getxo.net posta elektronikoaren bidez edo 944 660 136 telefono zenbakian ere eman dezakete. Argazkian, Keltse Eiguren Berdintasun zinegotzia.
“Jende aurrean hitz egiteko teknikak” ikastaroan beldurrak eta komunikazioan esku hartzen duten elementuak zeintzuk diren identifikatuko dituzte, horrela beren ezagutza eta entrenamendutik teknikak eskuratzeko eta zailtasunak gainditzeko. Bestalde, “Emakumeok komunikabideetan” ikastaroak komunikabideek emakumeak eta gizonak nolatan irudikatzen dituzten aztertuko du, bereziki bortxakeria matxistaren tratamendu mediatikoa. Azkenik, “Irakurketa feministak literaturan” tailerrak literaturara hurbiltzeko irakurbide feministez hausnarketa egingo du, eta eredu matxistak gainditzeko saioak proposatu ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun