Barrikako Udalak hainbat kultur jarduera antolatu ditu urtea amaitu artean. Irakurmena suspertzeko tailerrak izango dira urriaren 15 eta 29, azaroaren 12 eta 26, eta abenduaren 10ean, arratsaldeko 18:30etik 19:30era, udal liburutegian (Udaletxeko bidea, 2 - Txintxilandia eraikina). Urriaren 24an, Liburutegien Egunean, “Musika Tresnen Fabrika” antzerkia egongo da ikusgai Soinutek taldearen eskutik eguerdiko 12etan, udaletxean. Azaroaren 4an, “Internet: Facebook” seminarioa egingo da Kzgunean, goizeko 10etatik eguerdiko 12etara. Aurretik izena eman beharra dago. Azaroaren 27an, Emakumeenganako Indarkeriaren Kontrako Egunean, autoestimuari buruzko hitzaldia egingo da, 18:30etik 20:30era, udaletxean. Horrekin batera, azaroaren 28an, autoestimuari buruzko tailerra egingo dute 11:30etik 13:00era. Azaroaren 30ean, berriz, Ander Deuna Eguna ospatuko dute, Goierrin. Abenduaren 12an, “Xalto eta Brinko” pailazo emanaldia izango da eguerdiko 12etan, udaletxean. Azkenik, abenduaren 19an, Gabonetako tailerrak egingo dira, 11:00etatik 13:00etara, udaletxean. Argazkian, haurrak eta aita-amak jolasean Barrikako liburutegian.
Bitartean, Barrikako udal liburutegiak ekintza ludikoak biltzen dituen programa jarriko du abian, irakurketa eta liburuaren inguruan. Bere helburua da "liburutegiaren garrantzia eta irakurzaletasuna sustatzea", aipatu dutenez. 3 eta 12 urte bitarteko haurrei zuzenduta dago eta ondokoak uztartzen ditu: txotxongiloak, ipuin kontalariak, tailerrak, irudiak eta abar, beste jarduera batzuen artean. Ipuin kontalaria 4 urtetik gorako haurrei zuzenduta dago eta urriaren 15ean izango da. Ilustrazio tailerra urriaren 29an burutuko da eta, 6 eta 12 urte bitartekoei zuzenduta dago. Bere aldetik, azaroaren 12an egingo da idazketa tailerra 6 eta 12 urte bitartekoentzat. Txiki-zooa berriz, 3 eta 5 urte arteko haurrei zuzenduta dago eta azaroaren 26an jarriko da martxan. Azkenik, abenduaren 10ean, txotxongilo tailerra egingo da, 6 eta 12 urte arteko haurrentzat. Jarduera guztiak arratsaldeko 18:30etik 19:30era egingo dira. Parte hartu nahi duten pertsonek aurretik izena eman behar dute dagokion ekintzarako, liburutegian edota ondoko telefono zenbakian: 946 775 163.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun