Ludotekari dagokionez, 2007an, Itzubaltzeta / Romoko Ziztu Bizian eta Algortako Eskubeltz eskaut taldeek EDE Fundazioarekin batera osatutako Aisibizia elkarteak irabazi zuen zentroa kudeatzeko lehiaketa publikoa, Bizarra Lepoan zein Urtxintxa elkarteen eta beste hiru enpresen proiektuen aurretik. Baina, bi urteko esleipena bukatuta, pasa den abuztuan Udalak zerbitzurako proposamenak eskatu zizkien bi enpresari eta aurreko esleipenaren proiektu onenak aurkeztu zituzten Aisibiziari eta Bizarra Lepoani. Baldintza teknikoak aztertu ondoren, Bizarra Lepoanen eskaera izan ezik beste guztiak baztertu zituen Udalak. Hortaz, euskara taldeari esleitu dio Areetako ludoteka zerbitzua, 62.787,39 eurotan.
Ludoteka Areetako Eskoletako plazan, ohiko ipotxen plaza, dago, antzinako ehiztarien eta arrantzaleen elkarteko egoitzan. Zerbitzuko ordutegai, astelehenetik ostiralera bitartean, 17:00etatik 20:00etara izango da. Ludotekaren zerbitzu publikoak helburu hirukoitza du: umeak aisialdian heztea, jolasen bitartez teknikak eta bitartekoak irakatsiz; Itzubaltzeta / Romoko eta Areetako umeen garapena sustatu, errespetua, bakearen kultura, justizia, elkartasuna, aukera berdintasuna eta partaidetza oinarritzat hartuta; eta aisialdiaren esparruan euskara biziberritzea.
Getxoko Udalak Bizarra Lepoan Getxoko euskara elkarteari eman dio ikasturte honetan Areetako ludotekako 5 eta 11 urte bitarteko 100 bat ume jagon, hezi eta olgetako ardura. Gainera, esleipena beste urte batez luzatzeko aukera dago. Dagoeneko, elkarteak aurretik zerbitzua kudeatzen zuen Aisibizia elkarte kristauarekin bildu eta lanari ekin dio. Goizane Miruri Bizarra Lepoaneko dinamizatzaileak jakinarazi duenez, "irailaren bigarren astean egin zen eskualdaketa eta pasa den ostegunean hasi ziren umeak etortzen Hizkuntza Eskolaren ondoko ludotekara". Ume horietaz zein aurrerantzean izena eman dezaketenak arduratuko dira Bizarra Lepoaneko bi langileak, "umeen eta euren nahasmenerako, biak Maialen izenekoak". Bada, Maialenek denbora galdu ez eta ludotekako festa antolatu dute ostiralerako, urriak 2. Bertan, "ludotekako bazkideek, eta bazkide ez direnek ere, parte hartu dezakete". Jaia 17:00etan hasi eta 20:00ak arte luzatuko da, "tarte horretan makilaje tailerra, globoflexia eta magia saio parte hartzaile bat izango dugula", azaldu du Mirurik. Ume berriak matrikulatzeko aukera urte osoan zehar egongo da, leku libreak egonez gero. 5 eta 7 urte bitartekoek aukera izango dute astelehen, asteazken eta ostiraletan joateko; 8 eta 11 bitartekoek, berriz, astearte eta ostegunetan. Bitartean, Eskubeltz eskaut taldeak zabaldu duenez, Algortako Gauegun gaztelekua esleitu dio Aisibiziari Getxoko Udalak. Argazkian, besteak beste Bapiruke aisialdi proiektua eramaten du aurrera Bizarra Lepoanek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun