Ondiz eta Txorierriko hirigintza egitasmoak etxebizitza gehiago eraikiz suspertu nahi ditu Leioako Udalak
Krisiaren ondorioz geldirik dauden Ondiz eta Txorierriko hirigintza egitasmoak etxebizitza gehiago eraikiz suspertu nahi ditu Leioako Udalak. Eusko Jaurlaritzak oniritzia ematen badu, 2010etik aurrera babestutako ehun bat etxebizitza gehiago altxatuko dituzte bertan. Orain arte "ez da egon hirigintza egitasmo horien gastuei aurre egin izan dien enpresarik", joan den astean Eneko Arruebarrena alkateak adierazi zuenez. Dagoeneko "behin-behinean" onartu dituzte aldaketak Hirigintza Antolamendurako Plangintza Orokorrean (HAPO); eta Leioako Antolamendurako Aholkularitza Batzordearen onespena ere badauka egitasmoak. Txorierrin, salmenta libreko 53 etxebizitza aurreikusten ziren. Orain, ordea, 78 eraiki nahi dituzte: erdia babes ofizialekoak eta beste erdia tasatuak. Tokiko iturrien arabera, Eusko Jaurlaritza arduratuko litzateke horren kudeaketaz, lur desjabetzen bitartez; eta dauzkan eskubideei uko egin beharko lioke Leioako Udalak. Gainera, tokiko erakundeak berak ordaindu beharko luke Txorierri eta Lamiako-Txopoeta arteko igogailua. Bitartean, Ondizen, aurreikusitako salmenta libreko 48 etxeak egingo lirateke. BOEak 92tik 106 izatera pasatuko lirateke. Horretaz gain, prezio tasatuko 67 etxebizitza berri jarri nahi dituzte. Ondizko urbanizatze lanak egin eta babestutako etxebizitzak eraikitzeko kooperatiba berria eratuko dute. Argazkian, Eneko Arruebarrena Leioako alkatea, prentsaurrekoa ematen.
Ia 300 etxebizitza eraiki nahi dituzte Ondiz eta Txorierrin. Horietatik 48 salmenta librekoak eta gainontzekoak babes ofizialekoak edo prezio tasatukoak. Arruebarrenak zehaztu zuenez, azken horien salneurria -Ondizen gutxienez- "ohi baino pixka bat altuagoa" izango da: horren arabera, "BOE bat eskuratzeko baldintzak betetzen dituztenen gain, errenta handiagoa duten familia unitateek eskura ahal izango dituzte horiek, beti ere muga bat ezarrita", udal agintariak azaldu zuenez. Etxebizitzez gain, urbanizazio lanak eta sarbide berriak egin, eta ekipamendu publiko bat altxatu nahi dute ia 43.000 metro koadro dituen Ondizko eremuan. Txorierrin, berriz, Lamiako-Txopoeta arteko igogailua jartzeaz gain, lur azpiko aparkalekua eta oinezkoentzako bidea egin gura dituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun