Udalak enpresei eta komertzioei eskainiko dizkien zerbitzuetarako izango da Areetako azoka dagoen tokian altxatuko duten eraikineko alde bat. Gainera, Bizkaiko Foru Aldundiak berak jarriko ditu enpresa elkargune berria eraikitzeko sei milioi euroak. Aipatu zerrendako puntua bezala, garabiaren zerbitzua berriro kontratatzeko Baldintzen Plegua atzerapenik gabe idaztea aho batez erabaki zuten. Bestalde, Alderdi Popularrak eskatuta, Algortako Zubilleta aldean etxebizitzen kopurua areagotzearen beharra gaineratuko du Imanol Landa alkateak, aipatu gunean Hiri Antolaketarako Plangintza Orokorra aldatzeko proposamenaren idazketan. Beraz, esan gabe doa EAJren babesa jaso zuela PPren proposamena. PSE-EE, berriz, abstenitu egin zen. Marisa Arrue popularren bozeramailearen iritziz, "dagoeneko hiri-lurrak diren guneetan (Konporte, Iturribarri, Zubilleta, Benantzio...) gehiago eraikitzea da Getxo aldeko 8.000 etxebizitzen mamua usatzeko modu bakarra".
Oka kalea
Bestalde, Villamonte plazako behin-behineko eskaileretan atzemandako eraikitze-hutsuneak zuzentzeari argi berdea eman zioten; baita Algortako Oka kaleko 4. zenbakian dagoen orubea segurtasun, osasun eta apaindura egoera egokian mantentzeari ere, Getxoko PSE-EEk eskatuta. Luis Almansa tokiko sozialisten bozeramaileak azaldutakoaren arabera, bizilagunak behin baino gehiagotan salatu dute Oka kalean daukan orubea "utzita" daukala Udalak: "sastraka eta zikinkeriaz beteta egoten da, auzokideen etxebizitzetan sartzen diren arratoien ugaritzea erraztuz", azaldu zutenez. Hala ere, bizilagunei "lotsagabeki" erantzun zien Josu Loroño Komunikazio zinegotzi jelkideak, abuztuaren 27ko ETB2ko "Pasalo" saioan. Almansak aipatu zuenez, "saio ikusi zuten bizilagunek esan digutenez, arratoiak Oka kaleko udal orubetik ez datozela esan zuen Loroñok, auzokideen etxebizitzen garbitasuna eta higienea zalantzan jarriz".
Areetako merkatuaren ordez jarriko duten enpresa elkartegian aparkatzeko toki gehiago jartzea aztertuko dute
Areetako azoka ixtea onartu zuten joan den asteazkeneko osoko bilkuran, aho batez, Getxoko Udalbatzan ordezkaritza daukaten alderdi politikoek. Horrenbestez, pausu berri bat eman du Udalak aipatu eraikina bota eta, bere lekuan, 20 edo 25 enpresa hartuko dituen elkartegia altxatzeko. Horretaz gain, Biscaytik proiektuan aurreikusitako teknologia gunea jarriko dute bertan, Microsoft informatika enpresak kudeatuta. Tokiko iturrien esanetan, azokako egungo merkatariekin adostutako hitzarmena eman du horretarako bidea. Era berean, eraikinean aparkatzeko solairuen kopurua handitzea bideragarria den ala ez ere aztertuko dute. Udal batzarrean aurkeztutako mozioan, autoa uzteko tokien "urritasunaz" kexatu zen Getxoko PP. Marisa Arrue popularren bozeramailearen arabera, "90 tokiko solairu bakarra" jarri nahi dute eraikin berrian: "Leku horietatik 31 baino ez dira izango Getxoko Udalarenak; gainontzeko 59ak Aldundiarenak izango baitira", gaineratu zuenez. Hori dela eta, aparkatzeko beste lau solairu egitea eskatu zuen PPk; baita jarriko lituzketen 390 tokiak Getxoko bizilagunek erabili ahal izatea ere. Argazkian, udal osoko bilkura Getxon.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun