Aurtengo kartela aukeratu duen epaimahaia diseinu, komunikazioa eta arte plastikoetako ondoko profesional hauek osatu dute: Txelu Angoitia, argazkilaria; Pedro Maria Basañez, arkitektoa eta EHUko irakaslea; Nerea Mujika, Gerediaga elkarteko lehendakaria; Beatriz Pi, diseinatzailea; eta Imanol Larrinaga, artista plastikoa. "Zure eskura dago" goiburuaren bidez jendeari azokara joateko gonbita luzatu nahi diola azaldu du Merinok kartelaren aurkezpenean. "Kulturan inbertitzea guztion eskura dagoelako, ez pentsa hain garestia denik", gaineratu du.
Irudi indartsua
Diseinua eta irudiari buruz esan du azokaren 44. ediziorako "irudi indartsu bat" nahi zuela. Horrela, "elementu grafikoen ekonomia dago" kartelean (tipografia, marrak eta kolore bakar bat), "krisialdiak jota dagoen gaurko sasoiarekin bat etortzeko eta, gainera, gaur egun ez beharrezko eta ausazko mezuez mukuru dagoen inguru batean hobeto nabarmentzeko". Mezua berak kartelaren irudia osatzen du. Tipografiak bereganatzen du protagonismoa, eta bere antolamenduak liburu eta diskoen azokari buruz egiten du berba. Hizkiak bere gainean jartzen diren marra horizontalak apalak lirateke, eta irudi osoa liburuen apalategia.
Konposizioan azokaren zenbaki ordinala nabarmentzen da, 44, zeina beheko aldean irauli egiten da, nahi den disko edo liburu eskuragarri egingo digun eskailera sortuz. "Asmoa nuen irudi deigarri a egitea. Informazioa modu argian ematen da, distrakziorik gabekoa. Testu beltza hondo zuri baten gainean egoteak urrutitik irakurtzea errazten du, eta tinta bakarraren erabilerak produkzioa merkatu", azaldu du. Azkenik, estetika aldetik, XX. mendearen hasierako Austriako kartel modernistei keinu bat egin dio Mernok, kartel hauetan lerro horizontalak hizkien oinarri bezala erabiltzen baitziren testua banatzeko konposizioan zehar.
Durangoko Liburu eta Disko Azokaren 44. edizioaren kartela aurkeztu da gaur goizean Durangon bertan. Hirugarren urtez, kartela lehiaketa sistema bitartez aukeratu da, eta guztira 55 proposamen jaso dira, aurreko urtean baino 20 gehiago. Kartel irabazlearen egilea, gainera, Astrabuduako Lur Merino sortzailea izan da, "Zure esku dago" izenburuko lanarekin. Merinok 1.300 euroko saria jasoko du saria irabazteagatik. Diseinatzaile astrabuduarra Arte Ederretan lizentziaduna da, eta bere ibilbide profesionalean publizitate agentzia eta komunikabide ezberdinetan lan egin du, gaur egun "freelance" bezala aritzen delarik. Azpimarragarriak dira zenbait lehiaketetan jaso dituen sariak eta aipamenak: besteak beste, Gasteizko Andre Maria Zuriaren Jaietako kartelaren irabazlea izan zen, 2000 urtean; Doctor Deseo taldearentzat "Sexo, ternura y misterio" diskoaren diseinua egin zuen, 2008an; eta Espainia mailako Carsa Arte lehiaketaren 5. edizioan lehenengo saria jaso zuen, 2009an. Argazkian, Lur Merino, kartel irabazlearekin Landakon / © Txelu Angoitia - Durangoko Liburu eta Disko Azoka.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun