EAJren aldeko eta PPren eta PSE-EEren abstentzioarekin onartu zuen Getxoko Udalbatzak, orain bi asteazken egindako osoko bilkuran, Algortako Larrañazubi aldeko udal zabortegia zegoen lekuan jarritako Ingurumen Aretoaren "eskaintza egun dagoen eskaerara egokitzea". Horren bitartez, urteko aurrekontuan kostuen %33,71a aurreztuko dute, 96.550 euro guztira. Diru hori getxoztarrek dituzten beste behar batzuei erantzuna ematera bideratuko dute, udal iturriek zehaztu dutenez. Aldaketen artean, besteak beste, asteburuan zerbitzua murriztuko dute eta abuztuan aretoa itxita egongo da. "Egokitzapenek", ordea, begiraleen kopurua 3tik 2ra jaistea ekarriko dute; baita garbiketa zerbitzua berrantolatzea ere. Hala ere, proposatutako aldaketek ez dute eraginik izango orain arte Ingurumen Aretoa heziketako elementu bezala erabiltzen ari diren udalerriko ikastetxeengan, "kalitate berbera mantenduko baitu", tokiko arduradunen arabera. Argazkian, udal batzarra egin baino egun bat lehenago eman zuen aldaketen berri Keltse Eiguren Ingurumen zinegotziak.
“Egokitzapen horiek baliabideak optimizatzeko dugun beharragatik eramaten ari gara aurrera eta ez dute udalerriko ikastetxeetarako kalterik ekarriko, horiek aurretik jasotzen zituzten zerbitzu berberak edukitzen segituko baitute. Era berean, beste udalerri batzuetako eskolak ere artatzen segituko dugu, baina epealdi zabalagoekin", azaldu zuen Keltse Eiguren Ingurumen zinegotziak. Nabarmendu zuenez, “kostuen murrizketa egokitua dela uste dugu, Ingumen Aretoak eskainiko duen zerbitzua kalitatezkoa izaten segituko duen bitartean”.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun