PSE-EEk bihar eta etzi egingo du VI. Kongresua, Bilbon, Euskalduna Jauregian, txosten politikoa eztabaidatu eta alderdiko zuzendaritza berritzeko. Hala ere, aipatu agirian ez da "PPren aipamen zehatzik egingo" etorkizuneko balizko akordioak agertzen direnean. Horrelaxe adierazi du Jose Antonio Pastor PSE-EEren bozeramaile eta Bizkaiko idazkari nagusiak, Radio Euskadiri eskainitako elkarrizketan. Herri Irratian aipatu zuen Pastorrek berak, irailaren 17an, balitekeela eztabaidatu beharreko txosten politikoan PSE-EE eta PPren arteko hitzarmena 2011ko udal hauteskundeetara arte luzatzeko asmoa jasotzea. Getxoko Udala eta Arabako Foru Aldundia EAJri kentzea izango litzateke horren helburuetako bat. Orain, ordea, erabakia "(hauteskunde) emaitzak eskuartean" hartuko dutela esan du. Izan ere, PSE-EEk ez du baztertzen PPrekin egindako hitzarmena beste alderdi batzuetara zabaltzea, Pastorren arabera. Bihar bertan PSE-EEren bozeramaileari egindako elkarrizketa argitaratuko du "Berria" egunkariak. Argazkian, Jose Antonio Pastor Radio Euskadin / © PSE-EE.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun