Etzi, asteazkenarekin, Leioa eta Erandioko campuseko Arte Ederren fakultateko hamar ikasle eta ikasle ohien lanak biltzen dituen "Errotik" diziplina anitzetako erakusketa inauguratuko dute campuseko liburutegi nagusiko erakusketa aretoan. Ekitaldia eguerdiko 1etan izango da, eta bertan Carmelo Garitaonandia campuseko errektoreordea eta Agustin Ramos Arte Ederren fakultateko dekanoa izango dira. Ikasleen sorkuntzez gain, "artearekin eta bizitzarekin konprometituta dauden bost musika talderen eta antzerki talde baten lanak ere" biltzen ditu irailaren 21ean zabaldu zen erakusketak, unibertsitateko iturriek zabaldu dutenez. Hortaz, "Errotik"-en laugarren edizioa "arte-eremu anitzen bilgunea izango da: musika, antzerkia, performance-ak, pintura, grafismoa, eskultura eta teknologia. Erakusketa bat, bi kontzertu eta antzezlan bat burutuko dira artearen erro eta jatorri gisa ulertutako erradikalismoaren ideia ardatz izanik", antolatzaileen esanetan. Erakusketa urriaren 23ra arte egongo da zabalik, goizeko 11etatik arratsaldeko 3ak arte. Argazkian, Arte Ederren Fakultatea barrutik.
Ekimen osagarriak, berriz, Arboretumean, egingo dira. Esate baterako, urriaren 7an eta 8an bi kontzertu egingo dira 16:00etatik aurrera. Asteazkenean, Elbis Reever eta Vinagre taldeak igoko dira agertokira eta ostegunean aldiz, Anorexia Mental, Gora Japon eta Maha. Leku berberean, “¿Por qué Vd. va siempre de negro?” antzeztuko du Teatro Malpartida taldeak hilaren 8an, ostegunean, 12:00etan. "Errotik" arteen festa EHUko Kultur Gestiorako Bulegoak eta Arte Ederren Fakultateko Pintura Sailak sustatu dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun