Udaltzainek modu txarrean amaitu zuten atzo Gobela ondoan bizi duten auzotarrek Ollarretxe errotondan egiten ari ziren protesta baketsua. Igandero bezala, auzotarrak eguerdiko 12etatik 12:15era bitarteko kontzentrazioa egiten ari ziren, eta amaitzear zegoelarik, udaltzainen patruila batzuk heldu eta modu txarrean amaitzeko eskatu zieten, auzotar batzuei bultzaka eta oihuka. Auzotarrek kontzentrazioa egiteko Jaurlaritzaren baimena izateaz gain, aurreko igandeetan arazorik egon ez dela eta, harridura handiz jasan zuten udaltzainen portaera; bereziki, kontuan hartuta manifestarien artean umeak -batzuk oso txikiak- eta agureak zirela. Urduritasun eta beldur uneak ere bizi izan ziren bakean egiten ari zen protesta horretan. Arduradunak udal agintariekin harremanetan jartzen saiatu ziren arren, ez zen erantzunik egon. Argazkian, larunbatean ere mobilizatu ziren auzokideak Gorrondatxek antolatutako Gobelaren uholdeen ibilaldia egiten lehenengo eta Algortan manifestatzen ondoren, besteak beste PPko Marisa Arrue eta Jesus Toca-Toña zinegotziak eta ezker abertzaleko Christian Reinicke hautetsia lagun izan zituztela. Argazki gehiago hemen ikus daiteke.
Igandeko elkarretaratzean egondako auzotarrek zioten moduan "guk uholdeak jasan ditugu eta, hala eta guztiz ere oso ongi portatu gara udal erakundearekin, beti gure protesta bide baketsuetatik eraman izan dugula, ez dugu ulertzen horrelako tratua jasan izana, delinkuenteak bagina bezala, umeak eta jende edadetua tartean".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun