Getxoko Udalaren oharra:
Gaur asteartean, urriak 6, Gobernu Taldearen aginduz Salsidu-Aldapa aldean Gobela errekaren bi aldeetan eta erdiko oinezkoentzako babesgunean aparteko garbiketa abiatu dute (aldian-aldian hondakinak eta belar-sastrakak garbitzeko egin ohi diren lanez gain).
Aparteko garbitze lan hauek, pasa den hilaren 28ko Uholdeetako Batzorde Bereziaren azken batzarrean uholdeek kaltetutako Auzokideen Elkarteek hala eskatuta egingo dituzte.
Eskaera horri beren oniritzia ema zioten ere aipatu Batzordea osatzen duten alderdi politikoetako ordezkari guztiek.
Hondakinak eta belar-sastrakak garbitzeko lan hauetan behargin talde batek dihardu eta datorren asteko lehen egunetan amaituko dira beharrak.
Edonola ere, Gobernu Taldetik adierazi dute argi izan behar dela garbiketa honek ez duela saihestuko gune horretan urak gainez egiteko duen arriskua.
Gobelak kaltetutako auzokideen eta udal arduradunen arteko tentsioa baretzeko atzo batzar batera gonbidatu zituen auzotarrak Imanol Landa Getxoko alkateak, Ollarretxe errontondan udaltzainek sorturiko tentsio uneak bizi eta hurrengo egunean. Hainbat komunikabideri zehaztu diotenez, auzokideek oniritzia eman diote bihar batzarra egiteari, baina alde berean erreibindikazioak mahai gaineratu dituzte: igandean identifikatutako auzokidearen aurkako salaketa kentzea eta Gobela ibaiaren erabateko garbiketa burutzea. Kasu horretan, batzarra egiteaz gain, mobilizazio berririk ez lukete egingo urtarrilera arte, URA agentziak herrilanak hasi behar dituen datara arte, alegia. Baina Udalak bi aldarrikapenak bazterrean utziko balitu, garbiketa beren kabuz egin eta astero protestak burutzea ez dute baztertzem, orain arte protestak hilero egin ohi izan dutela. Dagoeneko, Udalak proposamenetariko bat onartu eta praktikan jarri du, Salsidu-Aldapa aldean Gobela errekaren bi aldeetan eta erdiko oinezkoentzako babesgunean aparteko garbiketa abiatu baitu gaur goizean. Argazkian, garbiketa lanen irudiak / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun