Getxoko Udalak jakinarazi duenez, bihartik, ostegunetik, aurrera, Gobela ibaian egiten ari diren ez ohiko garbiketa lanek Zubileta inguruez gain Gobelako beste eremu guztiak hartuko dituzte. Horretarako beste behargin talde bat jarriko dute lanean, hasteko Neguri Langile aldean. Lan taldeak ibilguan sastrakak eta ezpondak eta baita zaborrak ere kentzeko lanak indartuko ditu. "Edozein kasutan ere", udal iturrien arabera, "lan horiek duela egun batzuk inguru horretan martxan jarritakoen jarraipena izango dira". Lan horiekin, eta Itzubaltzeta / Romon ere iragarri dituztenekin batera, Gobela ibaiertzeak bi asteko epean garbi egongo dira. Garbiketa lan horiekin batera, ibaia arratoiez garbitzeko tratamendua eramaten ari da aurrera. Gaur, asteazken arratsaldean, lan horretan espezializatuta dagoen taldeak Elkano kaleko 21 zenbakiaren parean arratoiak hiltzen dihardu eta bertan bukatutakoan ibaitik gora segituko du. Aurreko egunotan, Etxezuriko, Plentzia Hiriko eta Itzubaltzeta / Romoko aldeetako ibaiertzetan ibili dira arratoiak hiltzen. Argazkian, atzo hasi ziren lehenengo garbiketa lanak Zubileta inguruan.
Imanol Landa alkatearen aburuz, “uholdeek kaltetutako auzokideen elkarteekin oztoporik gabeko harremana eduki dugu beti eta gure borondatea horrela lan egiten segitzea da. Horregatik, neurri horiekin beren eskaerei erantzuna ematen diegu, nahiz eta jakin lan horiek ez dutela eraginik izango gune horiek uholdeak jasateko duten arriskuan”.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun