Halaber, lapurretaren ustezko egileak dendaren kanpo aldean atxilotu zituzten udaltzainek, Ertzaintzak lagunduta. Bilbon bizi diren bi lagun dira. Gainera, Zinegotziak jakinarazi duenez, Udaltzaingoak Ertzaintzaren laguntzarekin pasa den asteburuan atxilotutako gaizkileek, beren “modus operandi” dela eta, aurreko astean gertaturiko lapurreta eta lapurreta saiakerekin zerikusia dute. Hartara, ikerketa egokia egin eta gero, lapurreta horiek egozteko ahaleginduko da Ertzaintza, erakunde honek hartu baitu auziaren ardura, ertzain-etxean aurkeztu baitituzte salaketak.
Indarrean dagoen legegintzaldiaren hasieran Getxoko Udaltzaingoak Merkataritzaren Unitatea sortu zuen, "denden segurtasunarekin lotutako gai guztiez arduratzeko" abiatutako jarduera bereziarekin batera. Unitate horretako kideek merkatariei informazio eta aholkuak ematen dizkiete delituzko ekintza baten aurrean zelan jokatu behar duten jakin dezaten, bai ekintza hori gertatu aurretik bai gertatutakoan ere. Udaltzaingoaren beraren Ikerketa Unitatearekin eta Ertzaintzarekin koordinatzen da Merkataritzaren Unitatea, dendetan ustez lapurtu dutenak atxilotu eta epailearen aurrera eramateko orduan.
Udal iturrien arabera, delinkuentzia mota hori, lapurretak horren barruan daudela, Ertzaintzaren zein Udaltzaingoaren eskuduntza da, eta "bi erakundeek era koordinatuan eta elkarlanean dihardute".
"El Correo Español"-i erantzuten "lapurreta-boladarik" ez dagoela dio Getxoko Udalak
Getxo udalerrian, Kepa Miñambres Llona Herritarren Segurtasunerako zinegotziaren arabera, bi lapurreta eta bi lapurreta saiakera izan ziren pasa den astean tabernetan, eta joandako asteburuan, larunbata eta igandera arteko gauean, hain zuzen ere, Itzubaltzeta / Romoko eta Areetako tabernetan beste bi lapurreta saiakera eta lapurreta bat denda batean izan dira. “Datu horiek dira Getxoko Udaltzaingoak dituenak eta argi uzten dute, hainbat hedabideek aurkakoa zabaldu badute ere, ez dela izan eta ez dagoela “lapurreta-boladarik” gure udalerrian”, esan du gaur Kepa Miñambresek, aipatu ez duen "El Correo Español" egunkariaren artikulu bati erantzuten. Udaltzaingotik baieztatu dutenez, gainera, lapurreta kopurua “ohiko batez bestekoaren azpitik” egon da. Argazkian, udaltzain bat motorrez patruilatzen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun