Itzubaltzeta / Romoko herri eskolaren egitaraua:
- 10:00etan, kafe tertulia gazte topaketen inguruan (kafea eta cola-cao egongo da, txokolate bizkotxoa bustitzeko).
- Hitzaldia "Nafarroa 1512-2012".
- Eztabaida: "Eskola ideala".
- Hitzaldia, brigadista baten eskutik.
Aixerrota institutuko herri eskolaren egitaraua:
- 10etan, futbito txapelketa.
- 11etan, hitzaldia: "Nafarroa 1512-2012".
- 11:30ean, luncha.
- 12:15ean, parodia.
- 13.30ean, bertso saioa eta euskal dantzen ikastaroa 14:00ak arte.
Ikasle Abertzaleen oharra:
Egutegi arrotzari, marra gorria!
Hispanitatearen egunean, ikasleok klasera!
Urriaren 12a oso egun esanguratsua da Araba, Bizkaia, Gipuzkoa eta Nafarroako ikasleontzat, eta ez ospatzeko ezer dugulako, urtez urte nahi ez dugun zerbait ospatzea inposatzen digutelako baizik.
Colon Ameriketara iritsi zela ospatzen dute espainiar patroiaren eguna den Pilarica egun honetan. Bertako lurrak sakeatu eta espainiarrek beraien inperioa handitu zutela hain zuzen ere.
Baina euskaldunontzat, bestelako esan nahia du gorderik egun honek. Urriaren 12a guretzat inposaketaren eguna baita. Egun honetan ospatzeko ezer izan ez, eta gure nortasun eta kulturaren gainetik, beraiena inposatzen baitigute.
Hezkuntza Sistema Arrotzek beraien jai egun eta eduki arrotzekin ospatzen duten eguna da urriaren 12a: Hispanitatearen egunaren edukia barneratzen digute, honen esan nahi eta ikonografiarekin, eta Espainian jai egun nazionala izanik, egutegi propiorik ez eta espainiarrena izatera behartzen gaituzte. Egutegi Arrotzen eta Curriculum Arrotzen jai eguna dela esan dezakegu, beraz.
Hezkuntza Sistema Arrotzek, euskal ikasleak espainol egiteko beste tresna bat besterik ez dira horrelako egunak, euskal ikasleok harro sentitu behar al dugu bada, gure herria zapaltzen duenaren egun nazionala ospatzerakoan?
Egun honetan Hezkuntza Sistema Propioa zapaltzen dutela agerikoa da, beraz. Euskaldunok Hezkuntza Sistema Nazional bat izateko dugun eskubide eta beharrizana urratu eta gure herriaren kultura eta historia kontuan izan gabe, jai egun arrotzak ospatzera behartzen gaituzte.
Guk aldiz, Hezkuntza Sistema Propio baten beharra dugu, Euskal Herriaren biziraupena bermatu eta euskal herritar gisa jarduteko. Eta egia esan, asko izan dira norabide honetan azken urteetan eman ditugun urratsak.
Euskal curriculuma behar dugu, euskal edukiz osatua egongo den curriculuma, euskal kultura, historia eta hizkuntza ardatz izango dituena.
Eta euskal egutegia behar dugu, euskal herritar bezala, gureak diren egunak ospatu eta gure identitatea garatzeko.
Hau guztia kontutan izanda, jai dute ikasle eta abertzaleok horrelako egun batean etxean, ezer egin gabe guardia zibilaren desfileak ikusten geldituko garela uste badute! Jai dute, Hezkuntza Sistema Arrotzek bortxaz inposaturiko edukiak txintik esan gabe tragatuko ditugula uste badute, eta jai dute, beraien jai egunetan jai hartuko dugula uste badute!
Euskal ikasleok, urte osoan zehar Hezkuntza Sistema Propioa eraikitzeko lanean badihardugu, urriaren 12an lan hori bikoizteko prest gaude.
1998.urtetik, Ikasle Abertzaleak-ek lehenengo herri eskolak antolatu zituenetik, urtez urte asko izan dira ofizialki ez bada ere, zabaltzea lortu ditugun ikastetxeak. Asko izan dira landu izan ditugun edukiak.
Herri eskolak antolatzea, Hezkuntza Sistema Arrotzekiko borrokan, ikasleok daukagun intsumisio jarrerarik garrantzitsuena da. Inposaketak gainditu, eta ikasleok, ikasleontzat diren eskolak antolatzen ditugu urtero. Egunerokotasunean, curriculum arrotzetan oinarritzen diren edukiek erakusten ez digutena ikasteko baliatzen ditugu gainera herri eskolak.
Intsumisio jarrera honekin beraz, ikasleok Euskal Eskola Nazionala praktikan eraikitzeko urratsak ematen ditugula ulertzen dugu. Diskurtso bat garatzeaz haratago, Estatuek inposaturikoari alternatiba errealak mahai gaineratu eta eduki propioak lantzeko esparruak eskaintzen baititugu.
Aurtengoan, eskoletan ezkutatzen diguten gure historia lantzeko hautua egin dugu. 1512 an eman zen Nafarroako konkistaren inguruan hitz egiteko parada izango dugu herri eskola hauetan. Gure nortasuna eraikitzeko historia ezagutzeak duen garrantziaz kontziente izanik, ikasleok gure buruak formatzearen ezinbestekotasuna ikusi eta urriaren 12a horretarako erabiliko dugu.
Horretarako, Nafarroa 1512-2012 plataformakoen laguntza izan dugu, eta hemendik, eskerrak eman nahi dizkiegu beraien laguntza eta beraien lanarengatik.
Baina horretaz gain, lekuan leku garrantzitsuak izan daitezkeen gaiak ere landuko dira ikasleen artean. Inguruak eragiten duten, eta egunerokotasunean hezkuntza prozesuan islarik ez duten gaiak, hain zuzen ere.
Beraz, aurten 50 eskola zabalduko ditugula esan dezakegu. Horietatik 3 gainera, modu ofizialean, edo bai behintzat normaltasunez irekiko direla jakin ahal izan dugu. Bat Gipuzkoan, eta Bizkaian bi.
Besterik gabe, euskal ikasle guztiei guretzat jai egun arrotza den horretan intsumisio jarrera bat izan eta klasera joateko deia egin nahi diegu. Ulertu dezagun guztiok, guztion konpromisoz eta eginahalaz, lortuko dugula herri honek herri bezala garatzeko behar duen egutegi propioa lortzea.
"Egutegi arrotzari, marra gorria!" lelopean, astelehenean, urriak 12, Hispanitatearen Egunari intsumisioa egin eta herri eskolak burutuko dituzte Hego Euskal Herriko dozenaka ikastetxeetan, Ikasle Abertzaleek antolatuta. Eskualdean, besteak beste, Itzubaltzeta / Romon eta Getxon prestatu ditu herri eskolak IAk, Itzubaltzeta gaztetxean eta Aixerrota institutuan, hurrenez hurren. Era berean, Betiko ikastolako gurasoek UKBERRI.NETi esan diotenez, Leioako ikastolan DBHko hainbat geletan klase arrunta emango dute bertako ikasleek. Ikasleen erakundeak zabaldu duenez, 1998az geroztik urtero egin ohi den bezala, urriaren 12a jai egun arrotza izanik, IAk antolatuta aurten ere herri eskolak burutuko dituzte: "euskal ikasleok, urte osoan zehar Hezkuntza Sistema Propioa eraikitzeko lanean badihardugu, urriaren 12an lan hori bikoizteko prest gaude". Nafarroan 1512an eman zen konkista izango da aurtengo eskolen gai nagusia, "gure historia propioa" lantzeko asmoz. Argazkian, Itzubaltzeta / Romon 2007n Espainiako Konstituzioaren Egunean egindako herri eskola.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun