Aurreko egunetan euria egin eta gauean ere atertu gabe aritu zen arren, 935 lagunek parte hartu zuten atzo, urriak 12, Algortako XXVII. Ibilaldi Neurtuan. "Ez da iazko errekorra gainditu", Itxartu Taldeko kideek adierazi zutenez. Hala ere, pozik agertu ziren antolatzaileek, "horrelako eguraldia egon eta asteburu luzea izanik, horrenbeste jende inguratu delako". Lehendabiziko proban 173 umek eta 152 laguntzailek (batez ere umeen gurasoek) parte hartu zuten eta ibilaldi nagusian 610 gizon-emakumek. "Goizean zehar euria izan dugu, batez ere eguerdi partean, baina hala ere jendea oso animoso ibili da norbera bere zereginetan", azaldu zuten Itxartukoek. Ume guztiei garaikurra eman zitzaien, denentzako berdina. Izan ere, Eusko Legebiltzarrak, Eusko Jaurlaritzak eta Bizkaiko Foru Aldundiak duten araudiaren arabera, halaxe jokatu behar da. Baina den-denak izan zuten sari banaketan oholtzara igo eta han garaikurra jasotzeko aukera. Nagusien artean, berriz, Gorka eta Gotzon izan ziren irabazleak. Biak Algortan bizi dira eta biak Biotz Alai abesbatzako kideak dira. Bigarren bikotea Iñaki eta Mari Carmenek osatutakoa izan zen, Mungiako Andui Mendi taldeko kideak biak. Eta hirugarrenak, Pedro eta Jose Ramon, Itxartuko kideak. Besteak beste, Imanol Landa Getxoko alkateak, Gotzon Muneta Algortako EAJko presidenteak eta Jose Antonio Romero Itxartu Mendigoizale Taldeko presidenteak banatu zituzten sariak. Argazkian, irabazleetako bat garaikurra altxatzen. Argazki gehiago ikusteko sakatu hemen.
"Partaidetzaren datuek argi azaltzen duten bezalaxe, Algortako Ibilaldiak geroz eta arreta gehiago lortu du eta etorkizunean ere halaxe jarraituko du izaten. Eguraldi txarrak ez du jendea atzera botatzen eta ez du botako", adierazi zuten Itxartu Taldeko kideek. Jose Antonio Romerok biziki eskertu zion jendeari bere parte hartzea, "ez baita erraza honelako eguraldia izanik, ibilaldi neurtuan parte hartzea, lokatz eta euri artean mendian ibili nahi izatea alegia". Itxartuko 82 laguntzailerentzako ere esker-hitzak izan zituen. "Talde gutxik dute edozein ekintzatan horrenbeste jende lanean jartzeko gaitasuna", gaineratu zuenez. Bestalde, ibiltariak heldu ahala, hamaiketakoa eskaini zitzaien eta Itxartuko trikitilariak aritu ziren musika jotzen, oso giro polita sortu zela. Ekitaldia bukatu ondoren, Itxartu Taldeko 60 laguntzaile baino gehiago Algortako batzokian bertan geratu ziren bazkaltzen, jaiari amaira ematen
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun