Uribe Kostako Amnistiaren Aldeko Mugimenduak atzo Etengabe bitakoraren bitartez aurreratu zuenez, Aner Mimenza (argazkian) Getxoko euskal preso politiko gaztea gaur, asteazkena, kaleratuko da Caceresko espetxetik, etxekoek epaileak ezarritako 10.000 euroko fidantza ordaindu ondoren. Harrera egingo zaio Algortan, herrira iristen denean, errepresioaren kontrako erakundeak adierazi duenez. Mimenza 2007ko urriaren 16an egindako operazioan atxilotu zuen Espainiako Poliziak, eta Baltasar Garzon Auzitegi Nazionaleko epaileak espetxeratzea agindu zuen AAMk "eskandalagarritzat" jotako auto batean oinarrituta. 2009ko irailean eman zuen Garzonek Aner eta Algortako, Getxo eta Berangoko beste hamar gazte prozesatzeko autoa. Bestela ere, irailaren 4an egindako epaiketan, fiskalak hiru urte eta erdiko zigor eskaera mantendu zuen Aner Mimenza eta Borxa Urberuaga gernikarra eta Asier Tapia donostiarrarentzat. Mercedes Gallizo Espetxe Zuzendaritzako arduraduna bertan zegoela, 2007ko abenduaren 21ean Soto del Realgo (Madril, Espainia) espetxean egindako protestagatik, "agintaritzaren kontrako atentatua" eta “desordena publikoa” leporatzen diete hirurei. Mimenzak eta beste biek egozten zaizkien akusazioak ukatu egin zituzten, sakabanaketa politika salatu baino ez zutela egin adieraziz. Oraindik ez da ezagutzera eman epaiketa horren sententzia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun